Qazaqstanda "Astana" brendimen avtobýstar shyǵaryla bastaidy, dep habarlaidy dalanews.kz.
Qazaqstanda otandyq kólik tehnikasynyń túrleri keńeitilip, jańa kólik óndirisi iske qosylady. Bul týraly Úkimet otyrysynda "Astana Motors" kompaniialar tobynyń tóraǵasy Nurlan Smaǵulov málimdedi.
"Kásiporynnyń negizgi jobalarynyń biri - "Astana" atty avtobýstar shyǵarý. Bul avtobýstar qytailyq tehnologiialyq seriktestermen birlesip ázirlengen, oǵan álemdik jetekshi óndirýshilerdiń komponentteri paidalanylady. Sonymen qatar, avtobýstardyń dizainyn jasaýǵa qazaqstandyq injenerler qatysty. Avtobýstar Qazaqstan aýmaǵynda óndiriledi", - dedi Nurlan Smaǵulov.
Onyń aitýynsha, dizel jáne gazben júretin avtobýstardyń seriialyq óndirisi biyl qarashada bastalady. Al "Astana" markaly elektr avtobýstarynyń óndirisin 2027 jylǵy naýryzda bastaý josparlanyp otyr.
