Qazaqstanda 2026 jyldyń qańtar-tamyz ailarynda araq óndirisi artqanymen, koniak, sharap pen syra óndirý kólemi tómendedi. Sonymen qatar ishki naryqta koniak satylymy da aitarlyqtai azaiǵan., dep habarlaidy dalanews.kz.
Araq óndirisi men satylymy ósti
2026 jyldyń alǵashqy segiz aiynda Qazaqstanda 47,2 mln litr araq óndirildi. Bul ótken jyldyń osy kezeńimen salystyrǵanda 6,7%-ǵa kóp. Ishki naryqta araq satylymy da ósken. Qańtar-tamyz aralyǵynda 53,2 mln litr ónim satylyp, jyldyq kórsetkish 5,1%-ǵa artty.
Koniak óndirisi 42%-ǵa qysqardy
Al koniak óndirisinde kerisinshe tómendeý baiqalady. Biyl segiz aida Qazaqstanda 4,08 mln litr koniak óndirildi. Ótken jyldyń sáikes kezeńinde bul kórsetkish 7,04 mln litr bolǵan. Osylaisha, óndiris kólemi 42%-ǵa azaiǵan. Ishki naryqtaǵy koniak satylymy da edáýir tómendedi. Byltyr qańtar-tamyzda 9,44 mln litr ónim satylsa, biyl bul kórsetkish 5,17 mln litrge deiin túsken. Tómendeý kólemi – 45,2%.
Sharap óndirisi de azaidy
Qazaqstanda sharap óndirý kólemi de qysqarǵan. 2026 jyldyń alǵashqy segiz aiynda 8,35 mln litr sharap óndirildi. Byltyr osy kezeńde 10,37 mln litr ónim shyǵarylǵan. Demek, óndiris 19,5%-ǵa tómendedi. Esepti kezeńde syra óndirisi de kemigen. Biyl qańtar-tamyz ailarynda 445 mln litr syra óndirildi. Ótken jyldyń osy kezeńindegi kórsetkish 473,86 mln litr bolǵan. Nátijesinde óndiris kólemi 6,1%-ǵa qysqardy.
Importty qosqanda, Qazaqstannyń ishki naryǵyna segiz aida 482,29 mln litr syra jetkizilgen. Onyń 51,5 mln litri shetelden ákelingen.
Bul kólemdi el halqynyń sanyna shaqqanda, ár qazaqstandyqqa aiyna shamamen 3 litr syradan keledi. Esepteýge balalar men eresekterdi qosa alǵanda, búkil halyq sany alynǵan. Sondyqtan bul kórsetkish naqty tutyný kólemin emes, jan basyna shaqqandaǵy shartty ortasha mólsherdi bildiredi.
Alkogol ónimderinen biýdjetke qansha aktsiz tústi?
2026 jyldyń segiz aiynda Qazaqstanda óndirilgen spirt pen alkogol ónimderine salynǵan aktsizderdiń jalpy kólemi 110,946 mlrd teńge.
