Ońtústik Koreianyń Ichhon qalasynda jergilikti júrgizýshige shabýyl jasady degen kúdikpen 21 jastaǵy Qazaqstan azamaty ustaldy. Qazaqstan Syrtqy ister ministrligi oǵan konsýldyq-quqyqtyq kómek kórsetilip jatqanyn habarlady, dep habarlaidy dalanews.kz.
Qazaqstan Syrtqy ister ministrliginiń málimetinshe, ustalǵan azamatqa bótenniń múlkin búldirý, kóshi-qon rejimin saqtamaý jáne kólikti paidalaný qaǵidalaryn buzý siiaqty birqatar quqyqbuzýshylyq boiynsha kúdik keltirilgen. Qazaqstandyq diplomattar oǵan konsýldyq-quqyqtyq qoldaý kórsetip, jaǵdaidy baqylaýda ustap otyr.
Ońtústik Koreianyń buqaralyq aqparat quraldarynyń habarlaýynsha, oqiǵa 29 shildede bolǵan. Kólikte otyrǵan Qazaqstannyń eki azamaty jergilikti júrgizýshini ańdyp, keiin onyń jolyn bógep, qorqytqan degen boljam bar. Er adamdardyń biri jábirlenýshiniń kóligin tepken. Oqiǵa beinetirkegishke túsip qalǵan.
Basylymdardyń málimetinshe, ustalǵan azamat áreketin kólik satyp alý jónindegi sátsiz kelisimmen túsindirgen. Onyń aitýynsha, ol jábirlenýshiniń kóligin mámile jasaýdy josparlaǵan adamnyń kóligimen shatastyryp alǵan.
Alǵashynda quqyq qorǵaý organdary kúdiktilerdiń kim ekenin anyqtai almaǵan. Keiin beinejazba internette taralǵan soń tergeý qaita jandanyp, politsiia kóliktiń memlekettik nómiriniń bir bóligin anyqtap, oqiǵaǵa qatysýshylardyń birin tapqan.
21 jastaǵy Qazaqstan azamaty 16 qazanda ustalǵan. Sot onyń qashyp ketý qaýpin eskerip, qamaýǵa alýǵa sanktsiia bergen. Al oqiǵaǵa qatysy bar ekinshi azamattyń jasy 25-te. Ol buǵan deiin kóshi-qon erejelerin buzǵany úshin Ońtústik Koreiadan elden shyǵarylǵan.
Qazaqstan Syrtqy ister ministrligi diplomattardyń ustalǵan azamatqa konsýldyq-quqyqtyq kómek kórsetip jatqanyn jáne jaǵdaidy baqylaýdy jalǵastyratynyn málimdedi.
Ustalǵan azamattyń kinási sottyń zańdy kúshine engen úkimimen dáleldengenge deiin ol kinásiz dep esepteledi.
