Qazaqstanda alǵash ret qarjylyq saýat olimpiadasy ótedi, dep habarlaidy Dalanews.kz.
Qazaqstan Respýblikasy Oqý-aǵartý ministrliginiń «Daryn» respýblikalyq ǵylymi-praktikalyq ortalyǵy alǵash ret 9-11 (12) synyp oqýshylaryna arnalǵan qarjylyq saýattylyq pen tsifrlyq qaýipsizdik boiynsha respýblikalyq olimpiada ótkizý bastamasyn kóterdi.
Bul joba oqýshylardyń qarjy salasyndaǵy bilimin arttyrýǵa, qarjylyq jaýaptylyq pen tsifrlyq qaýipsizdik mádenietin qalyptastyrýǵa baǵyttalǵan.
Olimpiadanyń birinshi (mektepishilik) kezeńi 17 qazan kúni barlyq óńirlerde oflain formatta ótedi. Qatysýshylar 30 suraqtan turatyn test tapsyrmasyn 60 minýt ishinde oryndaidy. Úzdik nátije kórsetken 30 oqýshy kelesi kezeńge joldama alady.
Barlyǵy tórt kezeńnen turatyn olimpiadanyń finaly 2026 jyldyń mamyr aiynda Astana qalasynda ótedi. Qorytyndy kezeńde ár óńir men respýblikalyq bilim berý uiymdarynan úzdik 150-den astam oqýshy baq synaidy.
