Qazaqstanda Web3 jáne blokchein tehnologiialary boiynsha 8 myńnan astam adam bilim alyp, 57 startapqa 121 mln teńge kóleminde grant berildi, dep habarlaidy dalanews.kz.
Bul týraly Úkimet otyrysynda «Solana Superteam KZ» korporativtik qorynyń basshysy Talǵat Dosanov málimdedi.
Onyń aitýynsha, Solana ekojúiesimen birlesken oqytý baǵdarlamalaryna qatysqan 8 myńnan astam adamnyń 2 myńnan astamy sertifikat alǵan. Sertifikat ieleriniń árbir besinshisi memlekettik organ ókili.
Baǵdarlamalar blokchein jáne ázirleý negizderin meńgerýdi, praktikalyq tapsyrmalardy oryndaýdy jáne komandalardy halyqaralyq hakatondarǵa daiyndaýdy qamtidy.
Tehnologiialyq kásipkerlikti qoldaý aiasynda 57 qazaqstandyq startapqa jalpy somasy 121 mln teńge grant bólingen. Qazaqstan Solana-nyń jahandyq hakatondaryna berilgen ótinimder sany boiynsha álemniń úzdik on eliniń qataryna kirgen.
Sonymen qatar Qazaqstan Solana Summit halyqaralyq is-sharalarynyń qataryn alǵash bolyp ótkizgen el boldy. Sammitke 30-dan astam elden 900-den astam adam qatysyp, is-shara Solana áleýmettik jelileri arqyly 4 mln adamǵa jetken.
Qazaqstanda blokchein tehnologiialaryn qarjy sektorynda qoldaný da keńeiip keledi. KASE Global alańynda Solana ekojúiesine negizdelgen SOLZ_KZ ETF iske qosylǵan. Al 2026 jylǵy 11 maýsymda Alatau City men Solana Foundation arasynda yntymaqtastyq týraly memorandýmǵa qol qoiylǵan.
Superteam Kazakhstan dereginshe, 2026 jyldyń alǵashqy jartysynda uiym ázirleýshilerge arnalǵan bilim berý baǵdarlamalaryn keńeitip, halyqaralyq hakatondarǵa qazaqstandyq komandalardy daiyndaý jáne qarjy institýttarymen birlesken jobalardy damytý jumystaryn jalǵastyrǵan.
Qazir Superteam Kazakhstan ózin Ortalyq Aziiadaǵy Web3-innovatsiialarynyń ortalyǵy retinde tanystyrady. Uiymnyń resmi málimetinshe, onyń komandasyn Talǵat Dosanov basqarady.
