Byltyr búdjet qarajatynyń tıimsiz paıdalanylǵany úshin ortalyq jáne jergilikti atqarýshy organdardyń 158 qyzmetkeri jaýapkershilikke tartyldy, dep habarlaıdy Dalanews.kz.
Qarjy vıse-mınıstri Dáýren Temirbekovtiń málimdeýinshe, 2023 jyly búdjet qarajatyn tıimsiz paıdalaný somasy 489 mlrd teńgeni quraǵan.
Tıimsiz paıdalanylǵan qarajattyń 87,2 mlrd teńgesi – kvazımemlekettik sektor sýbektileriniń shottaryndaǵy qaldyq, 143,2 mlrd teńgesi – ıgerilmegen búdjet qarajaty, paıdalanylmaǵan nysanaly transfertter men búdjettik kredıtter, 258,5 mlrd teńgesi – memlekettik aýdıt jáne baqylaý qorytyndylary boıynsha anyqtalǵan búdjet júıesi qaǵıdattarynyń buzylýy.
"Búdjet qarajatyn tıimdi jáne tolyq ıgerý úshin ákimshilerdiń jaýapkershiligin arttyrý maqsatynda sharalar qabyldandy. 2023 jyldyń qorytyndysy boıynsha ortalyq jáne jergilikti atqarýshy organdardyń birqatar qyzmetkeri tártiptik jaýapkershilikke tartyldy", - dedi vıse-mınıstr.
