Qazaqstanda 41 myń shaqyrym jol biryńǵai tsifrlyq júiege engizildi

Qazaqstanda 41 myń shaqyrym jol biryńǵai tsifrlyq júiege engizildi

Qazaqstanda avtomobil joldarynyń jaǵdaiy, jóndeý jumystary men sapasy týraly aqparatty bir jerden alýǵa múmkindik beretin E-Joldar tsifrlyq platformasy ázirlenip jatyr. Júie joldardyń tsifrlyq tarihyn qalyptastyryp, júrgizilgen jumystardy baqylaýǵa jáne jóndeýdi qajet etetin ýchaskelerdi anyqtaýǵa kómektesedi, dep habarlaidy dalanews.kz.

Qazir platformaǵa respýblikalyq mańyzy bar 41 myń shaqyrymnan astam jol týraly málimet engizilgen. Aldaǵy ýaqytta ony jol salasyndaǵy 12 aqparattyq júiemen biriktirý josparlanyp otyr.

Joldardyń tsifrlyq tarihy qalyptasady

E-Joldar arqyly árbir jol ýchaskesi týraly tolyq aqparat jinaqtalady. Atap aitqanda, joldyń tehnikalyq sipattamalary, jóndeý tarihy, merdiger uiymdar, paidalanylǵan qurylys materialdary men zerthanalyq synaqtardyń nátijeleri júiede saqtalady.

Bul belgili bir jol ýchaskesinde qandai jumystar júrgizilgenin, qandai materialdar qoldanylǵanyn jáne tekserý kezinde qandai kemshilikter anyqtalǵanyn baqylaýǵa múmkindik beredi.

Platforma KazRoadLab, RoadIQ jáne Sapar siiaqty qoldanystaǵy tsifrlyq júielermen integratsiialanady. Olar tiisinshe qurylys materialdarynyń sapasy men zerthanalyq synaqtar, joldardyń jaǵdaiyn baǵalaý jáne jóndeýdi josparlaý, sondai-aq jol boiyndaǵy servistik nysandar týraly aqparatty qamtidy.

Sonymen qatar E-Joldar-dy e-Otinish júiesimen bailanystyrý kózdelgen. Osy arqyly turǵyndardyń jol sapasyna qatysty shaǵymdary naqty ýchaskelerge tirkelip, tehnikalyq derektermen salystyrylady. Bul problemalyq joldardy anyqtaý kezinde azamattardyń ótinishterin de eskerýge múmkindik beredi.

Júrgizýshiler qandai aqparat ala alady?

E-Joldar tek memlekettik organdar men jol salasynyń mamandaryna arnalmaǵan. Qarapaiym paidalanýshylar da platforma arqyly joldardyń jai-kúii men jóndeý jumystary týraly aqparat ala alady.

Sondai-aq júrgizýshiler jol boiyndaǵy janarmai quiý beketterin, demalys jáne tamaqtaný oryndaryn izdei alady. Bul ásirese alys saparǵa shyǵatyn azamattarǵa baǵytty aldyn ala josparlaýǵa kómektesedi.

Jóndeý jumystary qalai josparlanady?

Platformanyń taǵy bir mindeti – jóndeý jumystaryn naqty qajettilikke qarai josparlaý. Ol úshin jol jabynynyń jaǵdaiy, kólik qozǵalysynyń qarqyndylyǵy, buryn júrgizilgen jóndeý jumystary men tekserý nátijeleri eskeriledi.

Jinaqtalǵan aqparat jóndeýdi birinshi kezekte qajet etetin ýchaskelerdi anyqtaýǵa jáne biýdjet qarajatyn tiimdi bólýge múmkindik beredi. Sonymen qatar joldardyń merziminen buryn buzylý sebepterin taldaýǵa jaǵdai jasaidy.

Qazirgi ýaqytta E-Joldar ázirlený ústinde. Biryńǵai tsifrlyq platformany 2027 jyldyń jazynda iske qosý josparlanyp otyr.