Qazaqstanda jyl basynan beri 2 myńǵa jýyq jasóspirim profilaktikalyq esepke qoiylyp, olardyń árqaisysymen jeke jumys júrgizilip jatyr, dep habarlaidy dalanews.kz.
Bas prokýratýranyń málimetinshe, bul jumystar kámeletke tolmaǵandar arasyndaǵy quqyq buzýshylyqtyń aldyn alýǵa baǵyttalǵan «Sanaly urpaq» jobasy aiasynda júzege asyrylyp jatyr. Joba sheńberinde táýekel tobyndaǵy balalardy erte anyqtaýǵa arnalǵan tsifrlyq profilaktikalyq karta engizilýde.
Vedomstvonyń habarlaýynsha, pilottyq joba alǵash ret Astanadaǵy úsh kolledjde synaqtan ótken. Nátijesinde jasóspirimder qylmysyna áser etetin negizgi faktorlar retinde bilim alý maqsatyndaǵy kóshi-qon, profilaktikalyq esepke ýaqytyly qoiylmaý jáne ata-analardyń baqylaýynyń jetkiliksizdigi anyqtalǵan.
Sondai-aq pilot barysynda tirkeýsiz turyp jatqan jáne memlekettik organdardyń baqylaýynan tys qalǵan 45 stýdent anyqtalǵan.
Bas prokýratýranyń málimetinshe, profilaktikalyq reidterdiń birinde Astanadaǵy túngi oiyn-saýyq mekemesinen 171 kámeletke tolmaǵan jasóspirim tabylǵan. Olardyń 108-i mektep oqýshysy, 63-i kolledj stýdenti bolǵan.
Barlyq jasóspirim politsiia bólimshesine jetkizilip, kináli tulǵalar jaýapkershilikke tartylǵan. Al oiyn-saýyq mekemesiniń qyzmeti ýaqytsha toqtatylǵan.
Vedomstvonyń málimetinshe, qabyldanǵan sharalardyń nátijesinde elde jasóspirimder qylmysy 5%-ǵa tómendep, tirkelgen qylmys sany 1110-nan 1061-ge deiin azaiǵan.
Jyl basynan beri respýblika boiynsha 6 myńnan astam profilaktikalyq reid ótkizilgen.
Bas prokýratýra jasóspirimderge internetti baqylaýsyz paidalaný, ata-analardyń jetkiliksiz kóńil bólýi, bilim alý maqsatyndaǵy kóshi-qon jáne táýekel tobyndaǵy balalardy der kezinde anyqtamaý keri áser etip otyrǵanyn atap ótti.
Sonymen qatar vedomstvo kámeletke tolmaǵandar arasyndaǵy sýitsidtiń aldyn alý máselesine de erekshe nazar aýdarylǵanyn málimdedi. Bas prokýratýranyń dereginshe, mundai jaǵdailardyń negizgi sebepteri retinde býlling, zorlyq-zombylyq jáne psihologiialyq qolaisyzdyq atalǵan.
