Qazaqstanda egin jinaý naýqany jalǵasyp, dándi daqyldardyń 61,6%-y jinaldy, dep habarlaidy dalanews.kz.
Aýyl sharýashylyǵy ministrliginiń málimetinshe, 9 qyrkúiektegi jaǵdai boiynsha sharýalar 9,6 mln gektar alqaptan dándi daqyldardy jinap alǵan. Bul jalpy egis kóleminiń 61,6%-yn quraidy. Ortasha ónimdilik gektaryna 14,1 tsentner bolyp, 13,5 mln tonna astyq bastyryldy.
Biylǵy egin jinaý qarqyny ótken jyldyń sáikes kezeńimen salystyrǵanda joǵary. Sonymen qatar jinalǵan astyqtyń sapasy da bir deńgeide saqtalyp otyr.
Litsenziialanǵan astyq qabyldaý kásiporyndaryna 2,83 mln tonna astyq jetkizilgen. Ótken jyldyń osy kezeńinde bul kórsetkish 552,7 myń tonna bolǵan. Osylaisha, qabyldanǵan astyq kólemi bir jylda bes eseden astam artqan.
Zerthanalyq zertteý nátijeleri boiynsha jinalǵan jumsaq bidaidyń 93%-y azyq-túlik klasyna jatqyzylǵan. Onyń 75%-y úshinshi synypty, 18%-y tórtinshi synypty bidai. Besinshi synypty jáne synypqa jatpaityn astyqtyń úlesi 7%-dy qurady.
Zerttelgen jumsaq bidaidyń 51%-ynda kleikovina mólsheri 28%-dan joǵary bolǵan. Taǵy 23,6%-ynda bul kórsetkish 25–27%, al 25,4%-ynda 23–24% deńgeiinde tirkeldi.
Ministrlik bul kórsetkishter jańa eginniń azyq-túliktik áleýeti joǵary ekenin kórsetetinin atap ótti. Jinalǵan ónim ishki naryqty sapaly astyqpen qamtamasyz etýge jáne otandyq agroónerkásip kesheniniń eksporttyq múmkindikterin arttyrýǵa múmkindik beredi.
Budan bólek, ózge aýyl sharýashylyǵy daqyldaryn jinaý jumystary da jalǵasyp jatyr. Qazirdiń ózinde 906,5 myń tonna maily daqyl tuqymy, 2,4 mln tonna kókónis, 1,8 mln tonna baqsha daqyly jáne 1,2 mln tonna kartop jinalǵan. Osylaisha, atalǵan daqyldardyń jalpy jinalǵan kólemi 6,3 mln tonnadan asty.
Óńirlerdegi shtabtar egin jinaý jumystaryn úilestirip, naýqandy belgilengen merzimde aiaqtaý úshin qajetti jaǵdaidy qamtamasyz etip jatyr.
Egin jinaý jáne kúzgi egis jumystaryna 401,1 myń tonna dizel otyny bólingen.
Aýyl sharýashylyǵy taýaryn óndirýshilerdi mineraldy tyńaitqyshtarmen qamtamasyz etý de jalǵasýda. Jyldyq qajettilik 2,3 mln tonna bolsa, qazirdiń ózinde 2 mln tonna nemese 85%-y jóneltilgen.
Qazirgi tańda negizgi mindetter — egin jinaý jumystaryn ýaqytynda aiaqtaý, jinalǵan ónimdi saqtaý, astyqty sapaly qabyldaý jáne azyq-túlikke qajetti astyq qoryn qalyptastyrý.
