Qazaqstanda 1223 eldi meken sý basý qaýpi bar aimaqtarda ornalasqan, dep habarlaidy Dalanews.kz.
Bul týraly Tótenshe jaǵdailar ministrliginiń baspasóz qyzmeti habarlady.
“Aimaqtarda aldyn alý jáne injenerlik jumystar júrgizilip, olardyń iske asyrylýyn TJM bólimsheleri qadaǵalaýda. Sý tasqynynyń aldyn alý sharalary respýblikalyq jáne óńirlik baǵdarlamalyq qujattar aiasynda júzege asyrylýda. Qazirgi tańda elimizde 1223 eldi meken sý basý qaýpi joǵary aimaqtarda ornalasqan”, – delingen dúisenbi kúni taratylǵan habarlamada.
Ministrliktiń málimetinshe, jalpy elimiz boiynsha 1400 sý tasqynyna qarsy is-shara júzege asyrylǵan.
“Halyqty qorǵaý maqsatynda uzyndyǵy 576 shaqyrymdy quraityn qorǵanys bógetteri men úiindiler turǵyzylyp, nyǵaityldy. 164 shaqyrymdyq drenaj júieleri jóndelip, qaita salyndy. Avtomobil jáne temir joldardyń astyndaǵy 960 sý ótkizý nysany jańartylyp, 658 shaqyrymdyq kanaldar men aryqtar jasaldy. 74 ózenniń qaýipti ýchaskelerinde 300 shaqyrymnan astam arnany tereńdetý jáne jaǵalaýdy bekitý jumystary júrgizildi, 190 shaqyrym ózen arnalary tazartyldy. Eldi mekenderde nóser jáne drenaj júielerin salý jáne jóndeý jumystary júrgizilýde. Sondai-aq, qysta qardy eldi mekenderden tys arnaiy poligondarǵa shyǵarý úshin qaýipsiz aimaqtar aldyn ala belgilendi”, – dep habarlady TJM.
Aqtóbe oblysynda sý tasqynyna qarsy sharalar tekserildi
“Kóktemgi tasqynǵa daiyndyq aiasynda oblys ákimi Ashat Shaharov negizgi sý aidyndary men sý basý qaýpi bar ýchaskelerdi tekserdi. TJD-niń shtabtyq basqarý kóligi men drondar kómegimen óńir basshysy Ilek jáne Qarǵaly ózenderiniń boiyndaǵy qaýipti aimaqtardy, sondai-aq Sazdin sý qoimasyn aralap shyqty. Qazirgi ýaqytta Ilek ózeniniń boiynda uzyndyǵy 1300 metrdi quraityn jaǵalaýdy bekitý jumystary júrgizilýde. Sonymen qatar, sý basý qaýpi bar “Aktiýbrentgen-14, 16”, “Ýrojainyi”, “Zelenstroi” baý-baqsha ujymdaryna erigen sýdy burý sharalary qolǵa alynǵan. Bul aýmaqtarda Ilek ózeniniń jaǵasyn nyǵaitý jumystary júrgizilip jatyr. Oblys ákimi sondai-aq Sazdin sý qoimasynda atqarylyp jatqan jóndeý jumystarymen tanysty. Munda sý jinaý aimaǵynyń túbin demontajdaý, eki qatar armatýramen beton quiý, tósem ornatý jáne muzdan qorǵaityn qabyrǵalar salý jumystary aiaqtaldy”, – dep habarlady vedomstvo.
Almaty oblysynyń Talǵar aýdanynda aldyn alý sharalary qolǵa alyndy
“Talǵar qalasynda sý tasqyny qaýpiniń aldyn alý jumystary jergilikti atqarýshy organdarmen birlesip júrgizilýde. Qala ákimi tikelei baqylaý jasap otyr. Is-sharalar aiasynda aryq júieleri men kanaldar tazartylyp, Qaztýǵan Jyraý kóshesiniń boiyndaǵy Topolevka ózeniniń arnalary tereńdetildi. Bul jumystar jalǵasatyn bolady, osylaisha aýdandaǵy qaýipsizdik deńgeii artady. Qazirgi tańda qala aýmaǵynda 38 shaqyrymdyq aryq júiesi men 30-dan astam kóshe tazartyldy. Aldaǵy ýaqytta osyndai sharalardy jalǵastyryp, qosymsha kanaldar salý josparlanǵan”, – delingen habarlamada.
Astanadaǵy jaǵdai qalai?
“TJD qyzmetkerleri men Tótenshe jaǵdailardyń aldyn alý komiteti ókilderi “Qazsýshar” kásipornynyń Aqmola filialymen birlesip Astana kontrrettegishin aralap shyqty. Erekshe nazar sý tasqyny kezeńinde sýdy jinaý jáne aǵyzý júiesiniń daiyndyǵyna, nysannyń rekonstrýktsiialaý jumystaryna aýdaryldy. Nátijesinde “Qazsýshar” mekemesine nysandy tiisti deńgeide ustaý jáne tasqyn sýdyń qaýipsiz ótýin qamtamasyz etý boiynsha usynystar berildi”, – dep habarlady TJM.
Jambyl oblysynda Talas ózeniniń jaǵalaýyn bekitý jumystary júrgizilýde
“Jambyl oblysynyń ákimi Erbol Qarashókeev Baizaq aýdanynda jáne Taraz qalasynda sý tasqynyna daiyndyq jumystarymen tanysty. Ákim Talas ózeniniń jaǵalaýyn bekitý sharalaryn baqylady. TJD qyzmetkerleri júrgizgen zertteý barysynda Baizaq aýdanynyń Sarykemer, Dihan, Aimantóbe jáne Kóstóbe aýyldarynda ózen arnasyn tazartý jáne nyǵaitý qajettiligi anyqtalǵan. Bul ýchaskelerde sý basý qaýpi joǵary. Qańtar aiynda bastalǵan jaǵalaýdy bekitý jumystary jalǵasýda. Jumys saparynyń qorytyndysy boiynsha Taraz qalasy men Jambyl aýdanynyń ákimderine ózen arnasyn qosymsha tekserip, tazalaý, tereńdetý jáne nyǵaitý sharalaryn qolǵa alý tapsyryldy”, – dep málimdedi vedomstvo.
Shymkentte sý tasqynyna qarsy shuǵyl jiyn ótti
“Shymkent qalasynyń TJD jergilikti atqarýshy organdarmen jáne basseindik inspektsiiamen birlesip sý tasqyny qaýpine bailanysty shuǵyl jiyn ótkizdi. Jiyn barysynda qaýipti aimaqtar tekserilip, yqtimal táýekelderge taldaý jasaldy. Aldyn alý sharalaryna erekshe kóńil bólindi. Mamandar jaǵalaýlardy nyǵaitý, sý aǵyzý arnalary men aryqtardy tazartý, halyqty der kezinde habardar etý máselelerin qarastyrdy. Quzyrly memlekettik organdarǵa injenerlik jáne jaǵalaýdy bekitý jumystary boiynsha usynystar berildi, sondai-aq sý tasqyny qaýpin azaitýǵa baǵyttalǵan qosymsha sharalardy ázirleý tapsyryldy”, – dep habarlady ministrlik.
