Almatydaǵy Respýblika saraiynda "Jibek joly" atty Túrkiianyń joǵary oqý oryndarynyń kórmesi ótti. Onda 12 túrik jáne 13 qazaqstandyq ýniversitet qatysty. Bul kórmeniń basty ereksheligi – álemde tuńǵysh ret túrik jáne qazaqstandyq joǵary oqý oryndary yntymaqtastyq týraly hattamaǵa qol qoiady.
Kórmeniń ashylý sátinde ýniversitet rektorlaryna jáne Túrkiia Respýblikasynyń Almatydaǵy Bas konsýly Evren Múdderrisoǵluǵa sóz berildi.
– Qazaqstan men Túrkiia ýniversitetteri ortaq ózara tiimdi yntymaqtastyq ornatý úshin arnaiy Memorandýmǵa qol qoiady. Bul jobany ótken jyly qyrkúiek aiynda bastadyq. Biyl bilim kórmesin 4-shi ret uiymdastyryp otyrmyz. Kelisim shart nátijesinde stýdentterdiń tájiribe almasýy men ortaq jobalar jyl ótken saiyn kóbeie beredi. Dál qazir Túrkiiada Qazaqstannan barǵan 8 myń stýdent bilim alýda. Jalpy Túrkiiada sheteldik bilim alyp jatqandar sany – 350 myń boldy. Biyl kórsetkishti 500 myńǵa deiin jetkizýdi kózdep otyrmyz. Onyń basym bóligi Qazaqstannan barady degen senimdemiz, – deidi Túrkiia Respýblikasynyń Almatydaǵy Bas konsýly Evren Múdderrisoǵlu.
Shara barysynda Qazaqstanǵa birinshi ret kelgen Yǵdyr ýniversitetiniń rektory Mehmet Hakky Alma óz jańalyǵymen bólisti.
– Osyndai joǵary oqý oryndarymen kásibi saladaǵy yntymaqtastyqqa alǵashqy qadam basýymyz. Bizge jáne stiýdentter úshin bul óte mańyzdy shara. Yǵdyr ýniversitetinde oqityn, sondai-aq oqyǵysy keletinderge bakalavriat, magistratýra, phd doktarantýra jáne oqytýshylardyń tájiribe almasýynda mańyzy bar qujattarǵa qol qoiamyz. Dál qazir bizdiń ýniversitetimizde 38 elden stýdent bar. Oqý orny janynan ashylǵan tehnoparkte muǵalimder óziniń biznesin asha alady. Sonyń nátijesinde stýdentterdi bilimmen sýsyndata júrip, jeke kásippen ainalysýyna múmkindik berdik, – deidi Mehmet Hakky Alma.
Budan soń rektorlardyń qatysýymen Túrkiia jáne Qazaqstan ýniversitetteri arasyndaǵy memorandýmdarǵa qol qoiyldy. Mańyzdy basqosýǵa barlyq baspasóz ókilderi shaqyryldy.
