الماتىداعى رەسپۋبليكا سارايىندا "جىبەك جولى" اتتى تۇركيانىڭ جوعارى وقۋ ورىندارىنىڭ كورمەسى ءوتتى. وندا 12 تۇرىك جانە 13 قازاقستاندىق ۋنيۆەرسيتەت قاتىستى. بۇل كورمەنىڭ باستى ەرەكشەلىگى – الەمدە تۇڭعىش رەت تۇرىك جانە قازاقستاندىق جوعارى وقۋ ورىندارى ىنتىماقتاستىق تۋرالى حاتتاماعا قول قويادى.
كورمەنىڭ اشىلۋ ساتىندە ۋنيۆەرسيتەت رەكتورلارىنا جانە تۇركيا رەسپۋبليكاسىنىڭ الماتىداعى باس كونسۋلى ەۆرەن مۇددەرريسوعلۇعا ءسوز بەرىلدى.

– قازاقستان مەن تۇركيا ۋنيۆەرسيتەتتەرى ورتاق ءوزارا ءتيىمدى ىنتىماقتاستىق ورناتۋ ءۇشىن ارنايى مەموراندۋمعا قول قويادى. بۇل جوبانى وتكەن جىلى قىركۇيەك ايىندا باستادىق. بيىل ءبىلىم كورمەسىن 4ء-شى رەت ۇيىمداستىرىپ وتىرمىز. كەلىسىم شارت ناتيجەسىندە ستۋدەنتتەردىڭ تاجىريبە الماسۋى مەن ورتاق جوبالار جىل وتكەن سايىن كوبەيە بەرەدى. ءدال ءقازىر تۇركيادا قازاقستاننان بارعان 8 مىڭ ستۋدەنت ءبىلىم الۋدا. جالپى تۇركيادا شەتەلدىك ءبىلىم الىپ جاتقاندار سانى – 350 مىڭ بولدى. بيىل كورسەتكىشتى 500 مىڭعا دەيىن جەتكىزۋدى كوزدەپ وتىرمىز. ونىڭ باسىم بولىگى قازاقستاننان بارادى دەگەن سەنىمدەمىز، – دەيدى تۇركيا رەسپۋبليكاسىنىڭ الماتىداعى باس كونسۋلى ەۆرەن مۇددەرريسوعلۇ.
شارا بارىسىندا قازاقستانعا ءبىرىنشى رەت كەلگەن ىعدىر ۋنيۆەرسيتەتىنىڭ رەكتورى مەحمەت حاككى الما ءوز جاڭالىعىمەن ءبولىستى.

– وسىنداي جوعارى وقۋ ورىندارىمەن كاسىبي سالاداعى ىنتىماقتاستىققا العاشقى قادام باسۋىمىز. بىزگە جانە ستيۋدەنتتەر ءۇشىن بۇل وتە ماڭىزدى شارا. ىعدىر ۋنيۆەرسيتەتىندە وقيتىن، سونداي-اق وقىعىسى كەلەتىندەرگە باكالاۆريات، ماگيستراتۋرا، phd دوكتارانتۋرا جانە وقىتۋشىلاردىڭ تاجىريبە الماسۋىندا ماڭىزى بار قۇجاتتارعا قول قويامىز. ءدال ءقازىر ءبىزدىڭ ۋنيۆەرسيتەتىمىزدە 38 ەلدەن ستۋدەنت بار. وقۋ ورنى جانىنان اشىلعان تەحنوپاركتە مۇعالىمدەر ءوزىنىڭ بيزنەسىن اشا الادى. سونىڭ ناتيجەسىندە ستۋدەنتتەردى بىلىممەن سۋسىنداتا ءجۇرىپ، جەكە كاسىپپەن اينالىسۋىنا مۇمكىندىك بەردىك، – دەيدى مەحمەت حاككى الما.
بۇدان سوڭ رەكتورلاردىڭ قاتىسۋىمەن تۇركيا جانە قازاقستان ۋنيۆەرسيتەتتەرى اراسىنداعى مەموراندۋمدارعا قول قويىلدى. ماڭىزدى باسقوسۋعا بارلىق باسپا ءسوز وكىلدەرى شاقىرىلدى.