Qazaqstan sulý kelinshek sekildi bárine birdei unaǵysy keledi
– Birikken Ulttar uiymynda 192 memleket bar. Siz 89 memleket degendi qaidan shyǵardyńyz? Qazaqstan – kún astyndaǵy alyp orys aiýy men qytai aidaharynyń arasynda óziniń senimdi ornyn tapqan jas ári myqty barys. Siz meniń elime til tigizbeńiz! – dep jaýap bergen. Jiyn sońynan álgi saiasatker Kamal Nizamulynan keshirim suraǵan.
Kamal Nizamulyn parlament depýtaty bolyp júrgen kezinde shet memleketterge arnaiy jiberedi eken. Óitkeni sheteldikter qazaq sarapshysy retinde Burhanovty tanyǵan. Ol birneshe ret Vashingtonda, Venada bolǵan halyqaralyq sarpashylarmen pikirtalasta óz kózqarasyn dáleldep shyqqan. 2011 jylǵy Jańaózen oqiǵasy kezinde Kamal Nizamuly eldiń aldyna shyǵyp, sóz sóilep, jurtshylyqty sabyrǵa shaqyrǵan.
Kamal Nizamulynyń balalyq shaǵy da óte qiyn kezeńde ótedi. Ol ósken ortada jalǵyz qazaq otbasy bolǵan. 1936 jyly ákesi qamalyp, anasy eki balasymen Tashkentke ketedi. Sol jerde eki balasyn balalar úiin ótkizip, ózi jumys isteidi. Anasy baidyń qyzy bolǵanyna qaramastan aýyr jumystar jasap, balalaryn oqytýǵa kúsh salady.
– Burhan atam kóripkel bolǵan eken. Stalindi 18 jyldan artyq ómir súrmeidi. Halyqqa da, dinge de qarsy úkimettiń bolashaǵy bolmaidy dep boljaǵan. Qaýipsizdik komitetinde saqtalǵan qujattardy qarap otyryp, sol derektiń shyndyǵyna kóz jetkizdim. Qyzylorda oblysyndaǵy qaýipsizdik komitetiniń muraǵatynda saqtalǵan. Ol jerde áli kúnge qupiia saqtalǵan qujattar bar eken. Men ony ashyp kórmedim. Qýǵynǵa ushyraǵandardy atqan jer – qazirgi tańda qoqys tastaityn eleýsiz meken. Biz sol jerdi taýyp belgi soǵyp, Quran baǵyshtadyq, – deidi Kamal Burhanov. Kamal Nizamuly týraly málimetter Dana Nurjigittiń «Dara jolynan» alyndy.
