گاودا وتكەن جيىندا ءبىر ساياساتكەر «قازاقستان سۇلۋ كەلىنشەك سەكىلدى. ول بىردەن 89 مەملەكەتكە ۇناعىسى كەلەدى»، – دەگەن پىكىر ايتادى. كامال نيزام ۇلى قولىن كوتەرىپ، سول جەردە وعان مىناداي جاۋاپ بەرگەن، – دەپ حابارلايدى alashinform.kz.

– بىرىككەن ۇلتتار ۇيىمىندا 192 مەملەكەت بار. ءسىز 89 مەملەكەت دەگەندى قايدان شىعاردىڭىز؟ قازاقستان – كۇن استىنداعى الىپ ورىس ايۋى مەن جۇڭگو ايداھارىنىڭ اراسىندا ءوزىنىڭ سەنىمدى ورنىن تاپقان جاس ءارى مىقتى بارىس. ءسىز مەنىڭ ەلىمە ءتىل تيگىزبەڭىز! – دەپ جاۋاپ بەرگەن. جيىن سوڭىنان الگى ساياساتكەر كامال نيزامۇلىنان كەشىرىم سۇراعان.

كامال نيزامۇلىن پارلامەنت دەپۋتاتى بولىپ جۇرگەن كەزىندە شەت مەملەكەتتەرگە ارنايى جىبەرەدى ەكەن. ويتكەنى شەتەلدىكتەر قازاق ساراپشىسى رەتىندە بۇرحانوۆتى تانىعان. ول بىرنەشە رەت ۆاشينگتوندا، ۆەنادا بولعان حالىقارالىق سارپاشىلارمەن پىكىرتالاستا ءوز كوزقاراسىن دالەلدەپ شىققان. 2011 جىلعى جاڭاوزەن وقيعاسى كەزىندە كامال نيزام ۇلى ەلدىڭ الدىنا شىعىپ، ءسوز سويلەپ، جۇرتشىلىقتى سابىرعا شاقىرعان.

كامال نيزام ۇلىنىڭ بالالىق شاعى دا وتە قيىن كەزەڭدە وتەدى. ول وسكەن ورتادا جالعىز قازاق وتباسى بولعان. 1936 جىلى اكەسى قامالىپ، اناسى ەكى بالاسىمەن تاشكەنتكە كەتەدى. سول جەردە ەكى بالاسىن بالالار ءۇيىن وتكىزىپ، ءوزى جۇمىس ىستەيدى. اناسى بايدىڭ قىزى بولعانىنا قاراماستان اۋىر جۇمىستار جاساپ، بالالارىن وقىتۋعا كۇش سالادى.

– بۇرحان اتام كورىپكەل بولعان ەكەن. ءستاليندى 18 جىلدان ارتىق ءومىر سۇرمەيدى. حالىققا دا، دىنگە دە قارسى ۇكىمەتتىڭ بولاشاعى بولمايدى دەپ بولجاعان. قاۋىپسىزدىك كوميتەتىندە ساقتالعان قۇجاتتاردى قاراپ وتىرىپ، سول دەرەكتىڭ شىندىعىنا كوز جەتكىزدىم. قىزىلوردا وبلىسىنداعى قاۋىپسىزدىك كوميتەتىنىڭ مۇراعاتىندا ساقتالعان. ول جەردە ءالى كۇنگە قۇپيا ساقتالعان قۇجاتتار بار ەكەن. مەن ونى اشىپ كورمەدىم. قۋعىنعا ۇشىراعانداردى اتقان جەر – قازىرگى تاڭدا قوقىس تاستايتىن ەلەۋسىز مەكەن. ءبىز سول جەردى تاۋىپ بەلگى سوعىپ، قۇران باعىشتادىق، – دەيدى كامال بۇرحانوۆ. كامال نيزام ۇلى تۋرالى مالىمەتتەر دانا نۇرجىگىتتىڭ «دارا جولىنان» الىندى.