Qazaqstannyń sheteldegi quqyqtyq múddesin qorǵaý ońai sharýa emes. Bul qomaqty qarjyny talap etedi. Ashyq derekterge qaraǵanda, britandyq zańgerlerdiń saǵattyq qyzmet aqysy 800 dollardan 3000 dollarǵa deiin barady, dep habarlaidy Dalanews.kz.
Protenge telegram arnasy “Samuryq-Qazyna” satyp alý portalynda jariialanǵan ashyq kelisimsharttarǵa kóz júgirtti.
“Ulttyq “PSA” JShS bedeldi Quinn Emanuel Urquhart & Sullivan UK LLP zań firmasymen 1 mlrd teńgeden astam somaǵa kelisim jasasqan. Bul shamamen 2 mln AQSh dollaryna teń. Qujatqa sáikes, kelisim sheteldik sottar men halyqaralyq arbitrajdarda Qazaqstannyń múddesin qorǵaýǵa baǵyttalǵan zańgerlik qyzmetterdi qamtidy”, - deidi derekkóz.
Ashyq aqparat kózderinde atalǵan halyqaralyq zań kompaniiasynyń tájiribesi aýqymdy, iri daýlarda jii kórinetin kásibi oiynshylardyń biri sanalady.
“Aita keterligi, burynǵy ádilet ministri Marat Beketaevtyń tusynda mundai shyǵyndar týraly aqparat jabyq sipatta bolǵan. Soǵan qaramastan, bul baǵytqa biýdjet qarajaty jumsalyp kelgeni belgili.
Árine, saǵatyna 3000 dollar kólemindegi qalamaqy qarapaiym qazaqstandyqqa tym qymbat kórinýi múmkin. Biraq halyqaralyq sot alańynda nátijege jetý úshin joǵary deńgeidegi kásibilikke aqy tóleýge týra keledi. Mundai daýlarda ákimshilik yqpal da, telefon quqyǵy da júrmeitini túsinikti”, - deidi derekkóz.
Onyń ústine bul shyǵyndardy qorǵalýy nemese el paidasyna óndirilip alynýy múmkin qarajat kólemimen salystyrǵanda, olardyń belgili bir dárejede ózin aqtaitynyn baiqaýǵa bolady. Máselen, Qazaqstan Qarashyǵanaq boiynsha arbitrajdyq daýda jeńiske jetip, shamamen 4 mlrd dollar kóleminde ótem alýy yqtimal. Is áli tolyq aiaqtalǵan joq, degenmen baǵyttyń durys ekeni ańǵarylady.
Jalpy, sheteldegi shyǵyndardyń ashyq jariialana bastaýy - quptarlyq úrdis. “PSA” mundai kelisimsharttardy jasyryp qalmai, ashyq kórsetýi de oń baǵalaýǵa laiyq. Endigi úmit - osy ashyqtyq bastamasy jalǵasyn tabady.
