قازاقستاننىڭ شەتەلدەگى قۇقىقتىق مۇددەسىن قورعاۋ وڭاي شارۋا ەمەس. بۇل قوماقتى قارجىنى تالاپ ەتەدى. اشىق دەرەكتەرگە قاراعاندا، بريتاندىق زاڭگەرلەردىڭ ساعاتتىق قىزمەت اقىسى 800 دوللاردان 3000 دوللارعا دەيىن بارادى، دەپ حابارلايدى Dalanews.kz.
Protenge تەلەگرام ارناسى “سامۇرىق-قازىنا” ساتىپ الۋ پورتالىندا جاريالانعان اشىق كەلىسىمشارتتارعا كوز جۇگىرتتى.
“ۇلتتىق “PSA” ج ش س بەدەلدى Quinn Emanuel Urquhart & Sullivan UK LLP زاڭ فيرماسىمەن 1 ملرد تەڭگەدەن استام سوماعا كەلىسىم جاساسقان. بۇل شامامەن 2 ملن اقش دوللارىنا تەڭ. قۇجاتقا سايكەس، كەلىسىم شەتەلدىك سوتتار مەن حالىقارالىق اربيتراجداردا قازاقستاننىڭ مۇددەسىن قورعاۋعا باعىتتالعان زاڭگەرلىك قىزمەتتەردى قامتيدى”، - دەيدى دەرەككوز.
اشىق اقپارات كوزدەرىندە اتالعان حالىقارالىق زاڭ كومپانياسىنىڭ تاجىريبەسى اۋقىمدى، ءىرى داۋلاردا ءجيى كورىنەتىن كاسىبي ويىنشىلاردىڭ ءبىرى سانالادى.
“ايتا كەتەرلىگى، بۇرىنعى ادىلەت ءمينيسترى مارات بەكەتايەۆتىڭ تۇسىندا مۇنداي شىعىندار تۋرالى اقپارات جابىق سيپاتتا بولعان. سوعان قاراماستان، بۇل باعىتقا بيۋدجەت قاراجاتى جۇمسالىپ كەلگەنى بەلگىلى.
ارينە، ساعاتىنا 3000 دوللار كولەمىندەگى قالاماقى قاراپايىم قازاقستاندىققا تىم قىمبات كورىنۋى مۇمكىن. ءبىراق حالىقارالىق سوت الاڭىندا ناتيجەگە جەتۋ ءۇشىن جوعارى دەڭگەيدەگى كاسىبيلىككە اقى تولەۋگە تۋرا كەلەدى. مۇنداي داۋلاردا اكىمشىلىك ىقپال دا، تەلەفون قۇقىعى دا جۇرمەيتىنى تۇسىنىكتى”، - دەيدى دەرەككوز.
ونىڭ ۇستىنە بۇل شىعىنداردى قورعالۋى نەمەسە ەل پايداسىنا ءوندىرىلىپ الىنۋى مۇمكىن قاراجات كولەمىمەن سالىستىرعاندا، ولاردىڭ بەلگىلى ءبىر دارەجەدە ءوزىن اقتايتىنىن بايقاۋعا بولادى. ماسەلەن، قازاقستان قاراشىعاناق بويىنشا اربيتراجدىق داۋدا جەڭىسكە جەتىپ، شامامەن 4 ملرد دوللار كولەمىندە وتەم الۋى ىقتيمال. ءىس ءالى تولىق اياقتالعان جوق، دەگەنمەن باعىتتىڭ دۇرىس ەكەنى اڭعارىلادى.
جالپى، شەتەلدەگى شىعىنداردىڭ اشىق جاريالانا باستاۋى - قۇپتارلىق ءۇردىس. “PSA” مۇنداي كەلىسىمشارتتاردى جاسىرىپ قالماي، اشىق كورسەتۋى دە وڭ باعالاۋعا لايىق. ەندىگى ءۇمىت - وسى اشىقتىق باستاماسى جالعاسىن تابادى.
