Qazaqstan shahmatshylary Londonda ótken blısten komandalyq álem chempıonatynda tamasha sheberlik kórsetip, komandalyq kúmis (KazChess komandasy) jáne alty jeke júlde, sonyń ishinde eki altyn medal jeńip aldy. Bul týraly Qazaqstan shahmat federasıasynyń baspasóz qyzmeti málimdedi,- dep habarlaıdy Dalanews.kz
Tamasha oıynymen jáne qaıtpas jigerimen erekshe kózge túsken KazChess komandasy fınalǵa shyqty.
«Londonda ótken blısten komandalyq álem chempıonatynda tamasha oıyn kórsetip, kúmis medal jeńip alǵan Kazchess komandasyn quttyqtaımyz! Biz shynymen de myqty jáne yntymaǵy jarasqan ujym qurdyq – jas shahmatshylarymyz ben tájirıbeli oıynshylarymyz búkil týrnırdi abyroımen ótkizip, sońyna deıin kúresti. Bul týrnır bizdiń álemniń eń myqty komandalarymen teń dárejede básekege túsip jatqanymyzdy taǵy da dáleldedi. Oıynshylarymyzdyń jasy men ambısıasyn eskere otyryp, aldaǵy ýaqytta talaı ret úlken jeńiske jetemiz dep senimmen aıtýǵa bolady», – dedi Qazaqstan shahmat federasıasynyń prezıdenti Tımýr Týrlov.
KazChess atynan qatysqandar:
- Aleksandr Grıshýk (2683, FID)
- Rıhard Rapport (2631, Vengrıa)
- Andreı Esıpenko (2646, FID)
- Dármen Sádýaqasov (2575)
- Aldıar Ańsat (2488)
- Merýert Kamalıdenova (2255)
- Elnaz Qalıahmet (2189)
- Islam Aıten (1929, áýesqoı shahmatshy)
Kapıtan — Gúlmıra Dáýletova.
«Biz óte baqyttymyz. Qazaqstan shahmaty úshin bul úlken jetistik», – dedi Qazaqstan shahmat federasıasynyń birinshi vıse-prezıdenti jáne komandanyń múshesi Dármen Sádýaqasov.
KazChess komandasy D tobyndaǵy oıynda ekinshi orynǵa shyqty, sodan keıin 1/8 fınalda Rookies komandasyn jeńdi, shırek fınalda Freedom ujymyn basyp ozdy jáne jartylaı fınalda Uzbekistan komandasynan basym tústi. Fınalda KazChess oıynshylary WR Chess Team ujymymen kezdesti, ol chempıon ataǵyna laıyq ekenin dáleldep, 75 000 eýro aldy. Vıse-chempıondarǵa – 50 000 eýro, kúmis júldegerlerge – 30 000 eýro, 4-shi oryn alǵandarǵa – 20 000 eýro, 5-shi orynǵa taban tiregen komandaǵa 15 000 eýro tabys etildi.
Qazaqstannyń alty ókili jeke esepte erekshelenip, týrnırlik perfomans boıynsha anyqtalatyn toǵyz taqtanyń árqaısysynda úzdik oıynshylar úshtigine endi. Erǵalı Súleımen (Rookies, 7-shi taqta) men Aldıar Saılaýbaı (Ashdod Elit Chess Club, 9-shy taqta) altyn medal jeńip aldy. Aldıar Ańsat (KazChess, 6-shy taqta), Ksenıa Balabaeva (Barys.kz, 7-shi taqta) jáne Dármen Dáýren (Rookies, 9-shy taqta) kúmis júldeni qanjyǵasyna baılady. Danıal Sápenov (Rookies, 2-shi taqta) qola medalge ıe boldy.
Rapıd pen blısten 2025 jylǵy komandalyq álem chempıonaty – tarıhtaǵy úshinshi is-shara. Birinshisi 2023 jyly Dússeldorf qalasynda ótti, ekinshisin 2024 jyly Astana qabyldady. Al bıyl 11-15 maýsym aralyǵynda Londonda 52 komanda jınaldy. Bir kún buryn rapıdten jarys aıaqtaldy: Team MGD1 altyn, Hexamind Chess Team kúmis, Freedom komandasy qola medal aldy. Blıste (3 mınýt + ár júris úshin 2 sekýnd) komandalar alty taqtada: tórt negizgi, bir áıelder taqtasynda, reıtıńi 2000-nan tómen áýesqoı oıynshyǵa arnalǵan bir taqtada baq synasty.
