قازاقستان شاحماتشىلارى لوندوندا وتكەن بليستەن كوماندالىق الەم چەمپيوناتىندا تاماشا شەبەرلىك كورسەتىپ، كوماندالىق كۇمىس (KazChess كومانداسى) جانە التى جەكە جۇلدە، سونىڭ ىشىندە ەكى التىن مەدال جەڭىپ الدى. بۇل تۋرالى قازاقستان شاحمات فەدەراسياسىنىڭ باسپا ءسوز قىزمەتى مالىمدەدى،- دەپ حابارلايدى Dalanews.kz
تاماشا ويىنىمەن جانە قايتپاس جىگەرىمەن ەرەكشە كوزگە تۇسكەن KazChess كومانداسى فينالعا شىقتى.
«لوندوندا وتكەن بليستەن كوماندالىق الەم چەمپيوناتىندا تاماشا ويىن كورسەتىپ، كۇمىس مەدال جەڭىپ العان Kazchess كومانداسىن قۇتتىقتايمىز! ءبىز شىنىمەن دە مىقتى جانە ىنتىماعى جاراسقان ۇجىم قۇردىق – جاس شاحماتشىلارىمىز بەن تاجىريبەلى ويىنشىلارىمىز بۇكىل ءتۋرنيردى ابىرويمەن وتكىزىپ، سوڭىنا دەيىن كۇرەستى. بۇل تۋرنير ءبىزدىڭ الەمنىڭ ەڭ مىقتى كوماندالارىمەن تەڭ دارەجەدە باسەكەگە ءتۇسىپ جاتقانىمىزدى تاعى دا دالەلدەدى. ويىنشىلارىمىزدىڭ جاسى مەن امبيسياسىن ەسكەرە وتىرىپ، الداعى ۋاقىتتا تالاي رەت ۇلكەن جەڭىسكە جەتەمىز دەپ سەنىممەن ايتۋعا بولادى»، – دەدى قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ.
KazChess اتىنان قاتىسقاندار:
- الەكساندر گريششۋك (2683، FID)
- ريحارد راپپورت (2631، ۆەنگريا)
- اندرەي ەسيپەنكو (2646، FID)
- دارمەن ءسادۋاقاسوۆ (2575)
- الديار اڭسات (2488)
- مەرۋەرت كاماليدەنوۆا (2255)
- ەلناز قالياحمەت (2189)
- يسلام ايتەن (1929، اۋەسقوي شاحماتشى)
كاپيتان — گۇلميرا داۋلەتوۆا.
«ءبىز وتە باقىتتىمىز. قازاقستان شاحماتى ءۇشىن بۇل ۇلكەن جەتىستىك»، – دەدى قازاقستان شاحمات فەدەراسياسىنىڭ ءبىرىنشى ۆيسە-پرەزيدەنتى جانە كوماندانىڭ مۇشەسى دارمەن ءسادۋاقاسوۆ.
KazChess كومانداسى D توبىنداعى ويىندا ەكىنشى ورىنعا شىقتى، سودان كەيىن 1/8 فينالدا Rookies كومانداسىن جەڭدى، شيرەك فينالدا Freedom ۇجىمىن باسىپ وزدى جانە جارتىلاي فينالدا Uzbekistan كومانداسىنان باسىم ءتۇستى. فينالدا KazChess ويىنشىلارى WR Chess Team ۇجىمىمەن كەزدەستى، ول چەمپيون اتاعىنا لايىق ەكەنىن دالەلدەپ، 75 000 ەۋرو الدى. ۆيسە-چەمپيوندارعا – 50 000 ەۋرو، كۇمىس جۇلدەگەرلەرگە – 30 000 ەۋرو، 4ء-شى ورىن العاندارعا – 20 000 ەۋرو، 5ء-شى ورىنعا تابان تىرەگەن كومانداعا 15 000 ەۋرو تابىس ەتىلدى.
قازاقستاننىڭ التى وكىلى جەكە ەسەپتە ەرەكشەلەنىپ، تۋرنيرلىك پەرفومانس بويىنشا انىقتالاتىن توعىز تاقتانىڭ ءارقايسىسىندا ۇزدىك ويىنشىلار ۇشتىگىنە ەندى. ەرعالي سۇلەيمەن (Rookies، 7ء-شى تاقتا) مەن الديار سايلاۋباي (Ashdod Elit Chess Club، 9-شى تاقتا) التىن مەدال جەڭىپ الدى. الديار اڭسات (KazChess، 6-شى تاقتا)، كسەنيا بالابايەۆا (Barys.kz، 7ء-شى تاقتا) جانە دارمەن داۋرەن (Rookies، 9-شى تاقتا) كۇمىس جۇلدەنى قانجىعاسىنا بايلادى. دانيال ساپەنوۆ (Rookies، 2ء-شى تاقتا) قولا مەدالگە يە بولدى.
راپيد پەن بليستەن 2025 جىلعى كوماندالىق الەم چەمپيوناتى – تاريحتاعى ءۇشىنشى ءىس-شارا. ءبىرىنشىسى 2023 جىلى ديۋسسەلدورف قالاسىندا ءوتتى، ەكىنشىسىن 2024 جىلى استانا قابىلدادى. ال بيىل 11-15 ماۋسىم ارالىعىندا لوندوندا 52 كوماندا جينالدى. ءبىر كۇن بۇرىن راپيدتەن جارىس اياقتالدى: Team MGD1 التىن، Hexamind Chess Team كۇمىس، Freedom كومانداسى قولا مەدال الدى. بليستە (3 مينۋت + ءار ءجۇرىس ءۇشىن 2 سەكۋند) كوماندالار التى تاقتادا: ءتورت نەگىزگى، ءبىر ايەلدەر تاقتاسىندا، رەيتينگى 2000-نان تومەن اۋەسقوي ويىنشىعا ارنالعان ءبىر تاقتادا ب ا ق سىناستى.
