Qazaqstan qaryzǵa belsheden batýda, sońǵy bes jylda eldiń syrtqy bereshegi 4 milliard dollarǵa artqan. Ulttyq banktiń dereginshe 2024 jyly eldiń syrtqy qaryzy 163 milliard dollardy quraǵan, bul osydan bes jyl burynǵy kórsetkishpen salystyrǵanda birneshe milliardqa kóp, - dep habarlaidy Dalanews.kz.
Qazaqstanǵa eń kóp nesie bergen el – Niderland: 42,6 milliard dollar. Degenmen, Qazaqstannyń Reseige aldyndaǵy bereshegi erekshe kózge túsedi. Sońǵy bes jylda Qazaqstannyń teriskei kórshisine qaryzy 47,1 paiyzǵa artyp, 13 milliard dollarǵa jetken. Bul Máskeýdiń Qazaqstan ekonomikasyndaǵy qarjylyq yqpaly men belsendiligin aitarlyqtai kúsheitip otyr.
Al Batys elderiniń tarapynan nesie berýshileriniń qaryzdary azaia bastaǵan. Ulybritaniia men AQSh Qazaqstanǵa qaryz berýdi aitarlyqtai azaitqan.
Osy ózgerister aiasynda Aziia Damý Banki men Dúniejúzilik densaýlyq saqtaý uiymy Qazaqstandaǵy jobalarǵa belsendi qatysyp júr. Jeltoqsan aiynda Aziia Damý Banki qarjylyq basqarýdy reformalaýǵa 350 million dollar bólse, al Dúniejúzilik banktiń kómegimen DDU pandemiiamen kúresý úshin 19 million dollar bólip, pandemiia qorynyń jobasyn qolǵa alǵan.
Eldiń burynǵy bas aýditory Natalia Godýnova memlekettik qurylymdardyń halyqaralyq qarajatty tiimsiz paidalanýyn synǵa alyp, neǵurlym ashyq jáne jaýapty qarjylyq basqarý qajet ekenin aitqan bolatyn.
Eske salaiyq, buǵan deiin reseilik kompaniialardyń qazaqstandyq jobalarǵa atsalysyp kire bastaǵanyn jazǵan edik. Máskeý Qazaqstandaǵy orys áleminiń «ambassadory», saiasatker jáne ekonomist Petr Svoik jáne birqatar sarapshy arqyly óziniń múddesin tyqpalaýǵa kóshken. Orystildi BAQ "Qazaqstannyń batysyndaǵy energetikalyq kompaniialardyń aktivin reseilikterge berý – Astana úshin durys sheshim bolmaq" degen úgit-nasihatty kúsheitýde.
Resei Eýroodaq pen AQSh-taǵy tyiym salynǵan aktivterin paidalana otyryp, Teńiz, Qarashyǵanaq jáne Qashaǵan munai-gaz jobalaryndaǵy sheteldik kompaniialardyń aktsiialaryn satyp alýy múmkin degen boljam bar.
«Meniń aitarym: Teńiz, Qarashyǵanaq jáne Qashaǵanaqqa (munai jáne gaz ken oryndary) aldaǵy jyldary Resei ielik etedi. Eki yqtimal jaǵdai bolýy múmkin. Birinshisi – ol jerden Batys kompaniialary ketedi. Olardyń ornyna reseilik, qytailyq jáne qazaqstandyq kompaniialar keledi. Al ekinshi stsenarii boiynsha Batys kompaniialary jergilikti tártipke baǵynyp jumys isteitin bolady. Biraq olar elden ketýge májbúr bolýy múmkin», - deidi Petr Svoik suhbatynda.
Taǵy bir reseilik BAQ-ta «Astana Táýelsizdiktiń alǵashqy jyldary qol qoiylǵan munaiǵa bailanysty kelisimderdi qaitadan qaraýdy kópten beri armandap júrgeni» jazylǵan.
«Sarapshynyń sózinshe, aktivterdi Reseige berý eń durys sheshim», - dep jazylǵan Fedpress.ru materialynda.
Osylaisha bul bastamanyń basynda qazaqstandyq taraptyń ózi turǵan bolýy múmkin ekeni aitylady. Reseilik sarapshy Igor Iýshkov mundai ózgeris kimge tiimdi ekenin aityp bergen.
