Qazaqstandyq "Biz Birgemiz Qazaqstan" qoǵamdyq qory Qyrǵyzstandaǵy selden zardap shekkenderge qoldaý kórsetý úshin 40 tonna gýmanitarlyq kómek jiberdi, dep habarlaidy Dalanews.kz.
Qyrǵyzstan tótenshe jaǵdailar ministrligi málim etkendei, 19 shilde kúni tańerteń júk kólikteri "Aq-Tilek" qazaq-qyrǵyz shekara beketinen ótip, Osh oblysyna jolǵa shyqqan.
Gýmanitarlyq kómek tielgen kólikte azyq-túlik ónimderi – un, qant jáne basqa da ónimder, eń qajetti taýarlar, sondai-aq gigienalyq zattar bar.
Eske salaiyq, 28 maýsymda Qyrǵyzstanda nóser jaýyn-shashyn jaýyp, Osh oblysynyń Nookat aýdanynda joiqyn sel tasqyny ótip, onyń saldarynan turǵyndar men týrister zardap shekti.
14 shildede Osh qalasy men Osh oblysynda joiqyn sel bolyp, saldarynan 5 adam qaza tapty.
Qaiǵyly oqiǵa bolǵan kúni shyǵys qazaqstandyq eki ul men eki qyz analarymen birge týystaryna barǵan.
"Tabiǵi apat ornynda qyrǵyz tarapynyń qutqarý qyzmetteri jumys istep jatyr. Qazaqstandyq diplomattar jergilikti bilikpen turaqty bailanysta. Bizdiń Qyrǵyzstandaǵy Elshiligimiz qaitys bolǵan balalardyń týystaryna barlyq qajet kómek kórsetip jatyr. Bul qaiǵyly oqiǵa QR Syrtqy ister ministrliginiń erekshe baqylaýynda", - dep jazylǵan SIM habarlamasynda.
Osyǵan bailanysty Qazaqstan Syrtqy ister ministri Murat Nurtileý Qyrǵyzstan SIM basshysy Jeenbek Kýlýbaevpen telefon arqyly sóilesip, tótenshe jaǵdaidyń mán-jaiyn jáne eki eldiń tiisti memlekettik organdarynyń ózara is-qimylyn talqylady.
