قازاقستاندىق "Biz Birgemiz Qazaqstan" قوعامدىق قورى قىرعىزستانداعى سەلدەن زارداپ شەككەندەرگە قولداۋ كورسەتۋ ءۇشىن 40 توننا گۋمانيتارلىق كومەك جىبەردى، دەپ حابارلايدى Dalanews.kz.
قىرعىزستان توتەنشە جاعدايلار مينيسترلىگى ءمالىم ەتكەندەي، 19 شىلدە كۇنى تاڭەرتەڭ جۇك كولىكتەرى "اق-تىلەك" قازاق-قىرعىز شەكارا بەكەتىنەن ءوتىپ، وش وبلىسىنا جولعا شىققان.
گۋمانيتارلىق كومەك تيەلگەن كولىكتە ازىق-تۇلىك ونىمدەرى – ۇن، قانت جانە باسقا دا ونىمدەر، ەڭ قاجەتتى تاۋارلار، سونداي-اق گيگيەنالىق زاتتار بار.
ەسكە سالايىق، 28 ماۋسىمدا قىرعىزستاندا نوسەر جاۋىن-شاشىن جاۋىپ، وش وبلىسىنىڭ نووكات اۋدانىندا جويقىن سەل تاسقىنى ءوتىپ، ونىڭ سالدارىنان تۇرعىندار مەن تۋريستەر زارداپ شەكتى.
14 شىلدەدە وش قالاسى مەن وش وبلىسىندا جويقىن سەل بولىپ، سالدارىنان 5 ادام قازا تاپتى.
قايعىلى وقيعا بولعان كۇنى شىعىس قازاقستاندىق ەكى ۇل مەن ەكى قىز انالارىمەن بىرگە تۋىستارىنا بارعان.
"تابيعي اپات ورنىندا قىرعىز تاراپىنىڭ قۇتقارۋ قىزمەتتەرى جۇمىس ىستەپ جاتىر. قازاقستاندىق ديپلوماتتار جەرگىلىكتى بيلىكپەن تۇراقتى بايلانىستا. ءبىزدىڭ قىرعىزستانداعى ەلشىلىگىمىز قايتىس بولعان بالالاردىڭ تۋىستارىنا بارلىق قاجەت كومەك كورسەتىپ جاتىر. بۇل قايعىلى وقيعا ق ر سىرتقى ىستەر مينيسترلىگىنىڭ ەرەكشە باقىلاۋىندا"، - دەپ جازىلعان ءسىم حابارلاماسىندا.
وسىعان بايلانىستى قازاقستان سىرتقى ىستەر ءمينيسترى مۇرات نۇرتىلەۋ قىرعىزستان ءسىم باسشىسى جەەنبەك كۋلۋبايەۆپەن تەلەفون ارقىلى سويلەسىپ، توتەنشە جاعدايدىڭ ءمان-جايىن جانە ەكى ەلدىڭ ءتيىستى مەملەكەتتىك ورگاندارىنىڭ ءوزارا ءىس-قيمىلىن تالقىلادى.
