Forým barysynda alǵash ret Iskerlik Keńestiń birinshi kezdesýi bolyp ótti.Forým jumysyna eki eldiń elshileri Erik Ótembaev pen Saidikram Niiazhodjaev, QR Investitsiialar jáne damý vitse-ministri Qaiyrbek Óskenbaev, Ózbekstan Respýblikasynyń syrtqy saýda ministriniń orynbasary Sohib Saifnazarov, Ońtústik Qazaqstan oblysynyń ákimi Janseiit Túimebaev, Ózbekstandaǵy saýda-ónerkásip palatasynyń tóraǵasy Adham Ikramov pen 400-den astam qos eldiń kásipkerleri qatysty.
Iskerlik jiynda sóz alǵan oblys ákimi J.Túimebaev búgingi basqosý baýyrlas elderdiń saýda-ekonomikalyq yntymaqtastyǵynyń artýyna múmkindik beretininin atap ótti.
«Qazaqstan men Ózbekstan – ózderiniń táýelsizdikterin nyǵaityp, bolashaqqa batyl qadam jasap kele jatqan memleketter. Ótken jyldarda qos taraptyń diplomatiialyq qatynastary ózara senimge negizdele otyryp damydy. Bul baǵyttaǵy jumystar búginde jańasha qarqyn alyp, ýaqyt talabyna sai jalǵasyn tabýda. Ózbekstan Respýblikasy Ortalyq Aziiadaǵy Qazaqstannyń negizgi strategiialyq áriptesteriniń biri bolyp tabylady.
Máselen, ótken jyly ekijaqty saýdanyń kólemi 30 paiyzǵa artyp, 2 milliard AQSh dollaryn qurady. Al eki eldiń kóshbasshylary biylǵy jyly saýda ainalymyn 3 milliard dollarǵa arttyrýdy, 2020 jylǵa qarai 5 milliard AQSh dollaryna deiin ulǵaitýdy tapsyrdy. Sondyqtanda qazirgi tańda eki eldiń kásipkerlerine naqty qoldaý kórsetý mańyzdy.
Búgingi is-shara osy aitylǵan mindettemelerdi júzege asyrýda septigin tigizeri anyq. Bul ózara yntymaqtastyqqa jáne eki el arasyndaǵy berik baýyrlastyq qatynastardy ornatýǵa baǵyttalǵan taǵy bir qadam», – dedi oblys ákimi.
OQO Kásipkerler palatasynyń uiymdastyrýymen ótken forým barysynda taraptar birlesken biznes jobalar men investitsiialyq usynystar jaiynda yntymaqtastyqty damytýdy sóz etip, eksport pen import boiynsha úshinshi elderge kirý jaiyn talqylady.
Búgingi tańda Ońtústik Qazaqstan oblysy men Ózbekstan Respýblikasy arasyndaǵy saýda-ekonomikalyq qatynas qarqyndy damyp keledi. Máselen, 2017 jyldyń qorytyndysy boiynsha eki eldiń taýar ainalymy 11,7 paiyzǵa artty.
Al osy jyldyń sońǵy úsh aiynyń kórsetkishi boiynsha OQO men Ózbekstan arasyndaǵy taýar ainalym 125,7 mln. AQSh dollaryn qurap otyr. Sonymen qatar, Ońtústikten Ózbekstanǵa 73,1 mln. dollar bolatyn ónim eksporttalsa, ol jaqtan bizge 52,5 mln. dollar kólemindegi taýar importtalǵan.
Búgingi forýmnyń basty ideialarynyń biri ónimderdi eń iri álemdik naryqta, sonyń ishinde Qytai men EEO-da birlesip shyǵarý jáne jyljytý bolyp tabylatynyn aitqan OQO Kásipkerler palatasynyń direktory Asqar Ábýbákirov aimaqtyq yntymaqtastyq forýmyn turaqty negizde ótkizý týraly usynysyn jetkizdi. Al atalǵan usynysty Ózbekstan tarapy biraýyzdan qoldady.
Aita keteiik, qazirgi ýaqytta OQO-da ózbek kapitalymen investitsiialyq jobalar iske asyrylýda. Mysaly, ótken jyly Badam indýstriialyq aimaǵynda gaz plitalaryn óndirý boiynsha tseh ashyldy. Budan basqa, Shymkenttegi indýstrialdy aimaqta investitsiia kólemi 8,6 mln.AQSh. dollar bolatyn bitým zaýyty salynyp jatyr.
Ońtústik Qazaqstanda osyndai jobalardy júzege asyrý úshin jalpy aýdany 959 ga qamtityn 11 indýstrialdy aimaq, sondai aq «Ońtústik» arnaiy ekonomikalyq aimaq pen Kólik jáne logistika aimaqtary bar.
Biznes-forým kezinde eki el kásipkerleriniӊ qatysýymen V2V formatynda kelissózder júrip, birqatar baǵytta iskerlik áriptestikti damytý maqsatynda eki jaqty qujattarǵa qoiyldy. Qatysýshylar ózara is-áreketter jaqyn bolashaqta óz nátijesin bererine senim bildirdi.
Sonymen qosa forýmǵa qatysýshylar otandyq taýar óndirýshiler usynǵan ónimder kórmesin tamashalady.
OQO ákiminiń baspasóz qyzmeti
