Qazaqstanda biylǵy bes aida 6,3 mln sharshy metr turǵyn úi paidalanýǵa berildi. Bul ótken jylmen salystyrǵanda 4,5 paiyzǵa kóp, dep habarlaidy dalanews.kz POVestka arnasyna siltep.
Ulttyq statistika biýrosy málimetinshe, 2025 jyly Qazaqstanda 20,1 mln sharshy metr turǵyn úi salynǵan. Bul kórsetkish boiynsha el Ortalyq Aziiada kósh bastap tur. Salystyrmaly túrde Ózbekstanda 15,8 mln, Tájikstanda 2,1 mln, al Qyrǵyzstanda 1,8 mln sharshy metr turǵyn úi paidalanýǵa berilgen.
Eýraziialyq ekonomikalyq odaq elderi arasynda turǵyn úi qurylysynyń kólemi boiynsha Qazaqstan Reseiden keiingi ekinshi orynda. Sarapshylar muny belsendi ýrbanizatsiiamen, ipotekalyq nesieleý naryǵy damýymen jáne turǵyn úidiń shamamen 90 paiyzyn salatyn jeke developerlik sektordyń belsendiligimen bailanystyrady.
Qyrǵyzstandyq saiasattanýshy ári sarapshy Baqyt Baketaevtyń aitýynsha, Qazaqstandaǵy turǵyn úi qurylysynyń joǵary qarqyny - memlekettiń júieli saiasatynyń nátijesi.
"Qazaqstanda qazir qurylys qarqyny buryn-sońdy bolmaǵan deńgeige jetti. Bul - bir rettik ósim emes, Prezident Qasym-Jomart Toqaevtyń qurylys salasyn damytýǵa jáne turǵyn úidiń qoljetimdiligin arttyrýǵa baǵyttalǵan uzaq merzimdi saiasatynyń nátijesi. Keiingi bes jylda qurylys kólemin kezeń-kezeńimen ulǵaitý, memlekettik qoldaý tetikterin jetildirý, injenerlik infraqurylymdy damytý jáne azamattardy sapaly ári qoljetimdi baspanamen qamtamasyz etýge basymdyq berildi", - dedi ol.
Sarapshylardyń pikirinshe, Qazaqstanda turǵyn úi qurylysynyń kólemi ǵana emes, oǵan degen kózqaras ta ózgerip keledi. Qazir jańa turǵyn úi keshenderi abattandyrylǵan aýlalarmen, áleýmettik nysandarmen jáne demalys oryndarymen birge salynady.
Sondai-aq, qurylys kompaniialary aýmaqtardy keshendi damytý qaǵidatyna kóbirek kóńil bólip, turǵyndardyń ómir súrýine, jumys isteýine, demalýyna jáne qajet qyzmetterdi jaqyn jerden alýyna qolaily jańa aýdandar salyp jatyr.
