Keiingi kezderi Qazaqstan naryǵyn Qytai kompaniialary jaýlap jatyr. Buǵan deiin birinshi qatarda tabylyp kelgen reseilik biznesten de asyp túsetin túri bar. 2024 jylǵy 1 qyrkúiek kúngi resmi derekterge qarasaq, elimizde 4674 qytailyq zańdy túlǵa men filial tirkelgen. Bir ǵana tamyz aiynyń ózinde 150 Qytai kompaniiasy jumysyn bastaǵan dep habarlaidy Dalanews.kz.
Buryn-sońdy bolmaǵan kórsetkish
«Birinshi kredittik biýro» sarapshylarynyń sózine súiensek, keiingi birneshe jylda ieleri qytailyq zańdy uiymdar birtindep kóbeiip kelgen. Biraq biylǵy tamyzdaǵy kórsetkish — rekord. Bir aida 150 jańa kompaniia naryqqa kirgen. Al jalpy alǵanda qazirgi tańda Qazaqstan aýmaǵynda 4,6 myńnan astam qytailyq zańdy tulǵa men filial jumys istep tur.
Biraq tirkelgenniń bári birdei «qyryp» jumys istep jatpasa kerek. Sebebi belsendileri — 3062 kompaniia. Bul degenimiz jalpy úlestiń úshten ekisine teń. Biraq qalai desek te, Qazaqstanda qytailyq kompaniia qaptaǵany kórer kózge kórinip tur.
Basqa eldermen salystyryp kórelik
Qazaqstannyń basqa seriktes-elderiniń ishinde tamyzda dál mundai kórsetkishke ie bolǵan el joq. Kerisinshe, el aýmaǵynda jumys istep jatqan kompaniia sany 221-ge qysqarǵan. Sonyń ishinde reseilik biznes sany bir aida 138-ge azaiypty. Al jańadan tirkelgen reseilik kompaniia sany tamyzda 31 bolǵan. Munyń aldyndaǵy kórsetkishtermen salystyrǵanda bul shama azyraq. Atap aitqanda, Qazaqstanda jumys istep jatqan Resei kompaniialarynyń sany 2022 jyldyń aqpanynan beri tuńǵysh ret bulai qysqarypty.
Dese de, qazaqstandyq aktivterdi satyp alýda reseilikterdiń belsendi ekenin atap ótý kerek. Ony resmi statistikalardan-aq baiqaýǵa bolady.
