كەيٸنگٸ كەزدەرٸ قازاقستان نارىعىن قىتاي كومپانييالارى جاۋلاپ جاتىر. بۇعان دەيٸن بٸرٸنشٸ قاتاردا تابىلىپ كەلگەن رەسەيلٸك بيزنەستەن دە اسىپ تٷسەتٸن تٷرٸ بار. 2024 جىلعى 1 قىركٷيەك كٷنگٸ رەسمي دەرەكتەرگە قاراساق, ەلٸمٸزدە 4674 قىتايلىق زاڭدى تٷلعا مەن فيليال تٸركەلگەن. بٸر عانا تامىز ايىنىڭ ٶزٸندە 150 قىتاي كومپانيياسى جۇمىسىن باستاعان دەپ حابارلايدى Dalanews.kz.
بۇرىن-سوڭدى بولماعان كٶرسەتكٸش
«بٸرٸنشٸ كرەديتتٸك بيۋرو» ساراپشىلارىنىڭ سٶزٸنە سٷيەنسەك, كەيٸنگٸ بٸرنەشە جىلدا يەلەرٸ قىتايلىق زاڭدى ۇيىمدار بٸرتٸندەپ كٶبەيٸپ كەلگەن. بٸراق بيىلعى تامىزداعى كٶرسەتكٸش — رەكورد. بٸر ايدا 150 جاڭا كومپانييا نارىققا كٸرگەن. ال جالپى العاندا قازٸرگٸ تاڭدا قازاقستان اۋماعىندا 4,6 مىڭنان استام قىتايلىق زاڭدى تۇلعا مەن فيليال جۇمىس ٸستەپ تۇر.
بٸراق تٸركەلگەننٸڭ بەرٸ بٸردەي «قىرىپ» جۇمىس ٸستەپ جاتپاسا كەرەك. سەبەبٸ بەلسەندٸلەرٸ — 3062 كومپانييا. بۇل دەگەنٸمٸز جالپى ٷلەستٸڭ ٷشتەن ەكٸسٸنە تەڭ. بٸراق قالاي دەسەك تە, قازاقستاندا قىتايلىق كومپانييا قاپتاعانى كٶرەر كٶزگە كٶرٸنٸپ تۇر.
باسقا ەلدەرمەن سالىستىرىپ كٶرەلٸك
قازاقستاننىڭ باسقا سەرٸكتەس-ەلدەرٸنٸڭ ٸشٸندە تامىزدا دەل مۇنداي كٶرسەتكٸشكە يە بولعان ەل جوق. كەرٸسٸنشە, ەل اۋماعىندا جۇمىس ٸستەپ جاتقان كومپانييا سانى 221-گە قىسقارعان. سونىڭ ٸشٸندە رەسەيلٸك بيزنەس سانى بٸر ايدا 138-گە ازايىپتى. ال جاڭادان تٸركەلگەن رەسەيلٸك كومپانييا سانى تامىزدا 31 بولعان. مۇنىڭ الدىنداعى كٶرسەتكٸشتەرمەن سالىستىرعاندا بۇل شاما ازىراق. اتاپ ايتقاندا, قازاقستاندا جۇمىس ٸستەپ جاتقان رەسەي كومپانييالارىنىڭ سانى 2022 جىلدىڭ اقپانىنان بەرٸ تۇڭعىش رەت بۇلاي قىسقارىپتى.
دەسە دە, قازاقستاندىق اكتيۆتەردٸ ساتىپ الۋدا رەسەيلٸكتەردٸڭ بەلسەندٸ ەكەنٸن اتاپ ٶتۋ كەرەك. ونى رەسمي ستاتيستيكالاردان-اق بايقاۋعا بولادى.
