Búgin, 2025 jyly 2 qazanda Memleket basshysy Qasym-Jomart Toqaev OPEK-tiń bas hatshysy Haitam ál-Gaisty qabyldady. Aqordanyń habarlaýynsha, taraptar álemdik munai naryǵynyń qazirgi jaǵdaiy men yntymaqtastyqtyń ózekti máselelerin talqylady, dep habarlaidy Dalanews.kz.
Memleket basshysy OPEK-tiń jahandyq munai naryǵynyń turaqtylyǵyn qamtamasyz etýge baǵyttalǵan kúsh-jigerin joǵary baǵalap, Haitam ál-Gaistyń saparyn elimiz ben uiym arasyndaǵy konstrýktivti dialogty damytýda mańyzdy qadam retinde qarastyratynyn atap ótti.
Prezidenttiń aitýynsha, Qazaqstan ulttyq múddeni qorǵaýǵa basymdyq bere otyryp, munai óndirý kólemin birtindep ulǵaitý jónindegi OPEK+ sheshimin qoldaidy.
Áńgimelesý barysynda óńirdegi energetikalyq júieniń ornyqtylyǵyn nyǵaitý baǵytyndaǵy birlesken sharalar pysyqtaldy. Sondai-aq munai óndirýshi elder men kómirsýtegin importtaýshy memleketter arasyndaǵy múddeler teńgerimin saqtaýdyń mańyzyna mán berildi.
Aita ketsek, OPEK hatshylyǵy 1 qazanda alty elden, atap aitqanda, Reseiden, Iraktan, Birikken Arab Ámirlikterinen, Kýveitten, Qazaqstannan jáne Omannan munai óndirisi kólemin qysqartý boiynsha qaryzdardy óteýdegi jańartylǵan kesteni alǵandaryn habarlady. Reuters agenttiginiń habarlaýynsha, bul qysqartýlar olardyń aldynda artyq óndirgen kólemin jabý úshin qajet ári ol 2025 jyldyń qyrkúieginen 2026 jyldyń maýsymyna deiingi kezeńdi qamtidy. Onyń basym bóligin Qazaqstan, odan keiin Irak, BAÁ jáne Resei qamtidy. Kestege sáikes, Qazaqstan aǵymdaǵy qosymsha kvotalardan tys óndiristi 2025 jylǵy qyrkúiekte táýligine 16 myń barrelden 2026 jylǵy maýsymda 656 myń barrelge deiin (total — 2917) qysqartýy tiis. 2026 jylǵy maýsymda barlyq alty eldiń qosymsha qysqarqan munai óndirisiniń jalpy kólemi táýligine 829 myń barreldi quraidy, al onyń 79%-y Qazaqstanǵa tiesili.
