Qazaqstan men Qytai arasyndaǵy áýe bailanysy aldaǵy ýaqytta taǵy da keńeiýi múmkin. Qytaidyń Urumqi Airlines áýe kompaniiasy Qazaqstanǵa úsh jańa halyqaralyq baǵyt boiynsha turaqty reisterdi iske qosýdy josparlap otyr. Bul týraly Azamattyq aviatsiia komiteti málimdedi, dep habarlaidy dalanews.kz.
Másele Kólik vitse-ministri Talǵat Lastaev pen Urumqi Airlines áýe kompaniiasynyń vitse-prezidenti Chjan Liannyń kezdesýi barysynda talqylandy. Kezdesý kezinde qytailyq tasymaldaýshy Úrimshi – Qaraǵandy, Qulja – Astana jáne Qulja – Almaty baǵyttary boiynsha turaqty áýe reisterin ashýǵa qyzyǵýshylyq tanytty.
Óz kezeginde qazaqstandyq tarap áýe kompaniiasyna marshrýttar jelisin keńeitýdi usynyp, Óskemen men Semeige, sondai-aq bolashaqta paidalanýǵa beriletin Zaisan jáne Katonqaraǵaidaǵy jańa óńirlik áýejailarǵa da reister oryndaý múmkindigin qarastyrýdy usyndy.
Kezdesý barysynda óńirlik aviatsiiany damytý máselesi de sóz boldy. Urumqi Airlines kompaniiasy qytailyq COMAC C909 ushaqtaryn paidalanatyndyqtan, osy áýe kemeleri negizinde Qazaqstanda birlesken óńirlik áýe kompaniiasyn qurý múmkindigi qarastyrylyp jatyr.
Komitettiń málimetinshe, mundai joba Zaisan men Katonqaraǵai siiaqty týristik áleýeti joǵary óńirlerge turaqty áýe qatynasyn jolǵa qoiýǵa jáne ishki óńirlik tasymaldy damytýǵa serpin berýi múmkin.
