Premer-ministr Álihan Smaiylov 2024 jyldyń 1 qyrkúieginen bastap 106 mektepte býllingke qarsy jumystyń findik modeli pilottyq rejimde engiziletinin málimdedi, dep habarlaidy Dalanews.kz.
“Balalardyń qaýipsizdigin qamtamasyz etý úshin barlyq bilim berý uiymdary Nusqaýlyqqa (2022 jylǵy 30 naýryzda Oqý-aǵartý ministrliginiń № 117 buiryǵymen bekitilgen) sáikes qaýipsizdik júielerimen jaraqtandyrylady. Búgingi tańda Nusqaýlyqtyń talaptaryna sáikes keletin bilim berý uiymdary 100 paiyz qaýipsizdik júielerimen (beinebaqylaý kameralary, jedel basqarý ortalyǵyna qosylý, dabyl túimeleri men týrniketterdi ornatý, sondai-aq kúzet agenttikterimen sharttar jasasý) jabdyqtalǵan. Jumysty birkelki jáne sapaly uiymdastyrý úshin barlyq bilim berý uiymdaryna zorlyq-zombylyqqa, býllingke ushyraǵan kámeletke tolmaǵandardy erte anyqtaý jáne olarǵa kómek kórsetý ádistemesi jetkizildi”, - dep atap ótedi Úkimet basshysy Senat depýtattaryna bergen jaýabynda.
Smaiylov álem boiynsha úzdik ádisterge zer sala otyryp, bilim berý uiymdarynda býllingke qarsy jumystyń findik modeli engiziletinin atap ótti. Osy tusta Finliandiianyń Týrký ýniversitetimen birigip, 8 myńnan astam muǵalim bilim alatynyn jetkizdi.
“2024 jylǵy 1 qyrkúiekten bastap respýblikanyń 106 mektebinde baǵdarlamany pilottyq rejimde engizý júzege asyrylady. Oqýshylar arasynda aldyn alý sharalaryn kúsheitý úshin ár mektepke iývenaldy politsiia qyzmetkerleri, ýchaskelik inspektorlar men jedel ýákilder (barlyǵy 6,5 myń qyzmetker) qatarynan politsiia qyzmetkerleri bekitildi. 2023 jyly 14 myńnan astam aldy alý is-sharasy ótkizildi”, - dedi Álihan Smaiylov.
