Kiik múiizderi – memlekettiń tolyq menshigi, olardy eksporttaý qarastyrylyp otyr. Bul týraly Qazaqstannyń ekologiia jáne tabiǵi resýrstar vitse-ministri Núrken Sharbiev málimdedi, dep habarlaidy Dalanews.kz.
"Qazir múiizge qatysty tyiym bar, kvota joq. Múiizderdi tolyq eksporttaimyz, bul – memlekettiń menshigi. Olar «Ohotzooprom» qoimalarynda esepke alynyp, saqtalýda", – dedi Sharbiev seisenbi kúni senattyń agrarlyq máseleler, tabiǵat paidalaný jáne aýyldyq aýmaqtardy damytý komitetiniń keńeitilgen otyrysynda depýtattardyń suraqtaryna jaýap bere otyryp.
Onyń aitýynsha, qoimalarda ǵalymdar usynǵan saqtaý ádistemesi qoldanylady.
"Qarasha aiynyń sońynda – jeltoqsan aiynyń basynda Ózbekstanda Eýroodaq qatysatyn halyqaralyq ekologiialyq uiymnyń otyrysynda Qazaqstanǵa kvotany alyp tastaý máselesi qaralady. Sol arqyly bizge múiizdi saýdalaýǵa quqyq berilmek. Biz bir vedomstvolyq uiymymyzdyń bazasynda aýktsiondar men elektrondyq saýda arqyly ótkizý úshin qurylym jasaimyz. Múiiz suranysqa ie elderde belgilengen eń tómengi baǵany anyqtaimyz", – dep qosty vitse-ministr.
Onyń aitýynsha, bul kvotany alǵash engizgen Mońǵoliia Qazaqstannan shyǵatyn ónim tek óńdelgen kúide bolýyn talap etip otyr. Qazaqstan oǵan da daiyn: múiizdi untaq nemese daiyn ónim túrinde eksporttaý qarastyrylýda.
Vitse-ministrdiń aitýynsha, respýblikaǵa kóptegen investorlar kelýde: «qytailyqtar, Ámirlikterden, qazir zaýyt ornatyp, óńdeýdi qolǵa alǵysy keletinder týraly ákimdikter deńgeiinde talqylaýlar júrip jatyr».
