Búginde memlekettik basqarý júiesinde kóptegen jastar eńbek etip júrgenin jaqsy bilemiz. Biraq elimizdegi saiasattyń kórigin qyzdyratyn jergilikti jerdegi máslihattar men QR Parlamenti Májilisinde jastar tym az. Osyǵan nazar aýdarǵan Memleket basshysy belsendi jastardy qoǵamdyq-saiasi jumystarǵa tartýdy quzyrly oryndarǵa tapsyrǵan-dy.
Osy zańnyń arqasynda aldaǵy Parlament Májilisi sailaýyna jastar belsene qatysyp, saiasi naýqannyń kórkin qyzdyraiyn dep tur. Memleket basshysy Qasym-Jomart Toqaev partiialyq sailaý tizimderinde áielder men jastarǵa arnalǵan mindetti 30 paiyz kvotany qarastyrý týrasyndaǵy oiyn Ulttyq senim keńesinde jariia etkeni esimizde.
Resmi derekkózderine júginsek, elimizde 2016 oblystyq, aýdandyq jáne qalalyq máslihattar elimizdi órkendetip, gúldendirý jolynda jumys istep jatqanyn baiqaýǵa bolady. Máslihattarda 3074 depýtat jergilikti bilik oryndarynda halyqtyń múddesin joǵary jaqqa jetkizip, oi-paiymdaryn aityp keledi. Jergilikti jerdegi máslihat depýtattarynyń basym bóligin Nur Otan partiiasynyń belsendileri quraidy. Olardyń arasynda jastardyń úlesi qansha degen suraq týyndaidy.
Taǵy da statistikalyq derekkózderine kóz júgirtetin bolsaq, jasy 30-ǵa ilikpegen máslihat depýtattarynyń úlesi bar bolǵany 2,7% ekenin baiqaimyz. Bul óte tómen kórsetkish. Bilikten úmiti bar saiasi partiialar osy olqylyqtyń ornyn biyl toltyrýǵa zań boiynsha mindetteldi. Aldaǵy ýaqytta elimizdiń saiasi júiesi jasaryp, boiyna qan júgiredi.
Álemdi sharpyǵan pandemiia da jastardyń bilikke kelý úrdisin jyldamdata túsken syńaily. COVID-19 virýsynyń alǵashqy tolqyny kezinde elimizdegi belsendi jastar men eriktiler jan-jaqty jumys istep, ózderine jaýapkershilik júgin júkteýge bolatynyn naqty ispen kórsetti.
Kóktemde kórshiles Qytaidyń Ýhan qalasynda koronavirýs ýshyǵyp turǵan kezde sol jerde bilim alyp jatqan Qazaqstannyń stýdentterin elge jetkizý kerek boldy. Al olardy elge jetkizý máselesi sóz bolǵanda jaǵdaida orta jastaǵy ushqyshtar bas tartqany esterińizde bolar. Sol kezde jas ta bolsa tájiribesi mol Aslan Ashatuly esimdi azamat sýrylyp shyǵyp, bul iske táýekel etkenin elimizdegi aqparat quraldary jarysa jazǵan edi.
Osy bir ǵana jaittan qazaq jastarynyń memleket pen halyq aldynda jaýapkershilik júgin arqalaýdan qashpaitynyn baiqaýǵa bolady. Jalpy, pandemiia kezinde talai jastar eriktiler tobyna qosylyp, el azamattarynyń amandyǵy úshin kúreskenin bilemiz.
Óz kezeginde bilik basyndaǵy azamattar da qazaq jastarynyń osyndai is-áreketterin esepke alyp, olardy elimizdiń qoǵamdyq-saiasi ómirine belsene aralasýyna múmkindik jasady. Osylaisha, Qazaqstan aidai álemge jastardyń arman-maqsattaryn iske asyrýǵa múmkindik bergen el retinde taǵy da tanyla tústi. Aldaǵy ýaqytta elimizdegi jastar osy múmkindikti barynsha paidalanyp, ortaq Otanymyz – Qazaqstannyń gúldenýine óz úlesterin qosýy kerek.
Nurlan JUMAQANOV, jýrnalist.
