Qazaqstan Kaspii teńizi arqyly Iranǵa mai ónimderin eksporttaýdyń jańa baǵytyn belsendi damyta bastady. Aqtaý portynan 4 sáýir kúni 5 myń tonna raps maiy tielgen alǵashqy keme jóneltilse, ótken aptada ekinshi partiia jol tartqan, dep habarlaidy dalanews.kz.
Maily daqyldardy óńdeýshiler ulttyq qaýymdastyǵynyń dereginshe, Iran jyl saiyn shamamen 3,5 mln tonna ósimdik maiy men shrot importtaidy. Keiingi úsh jylda Qazaqstan bul elge 100 myń tonnadan astam ónim eksporttaǵan. Onyń negizgi bóligi shrot bolǵanymen, endi otandyq óndirýshiler mai eksportyn arttyrýǵa múddeli.
Sala ókilderiniń baǵalaýynsha, Qazaqstan aldaǵy ýaqytta Iranǵa jylyna 150-200 myń tonnaǵa deiin mai jetkize alady. Al perspektivada mai men shrot eksportynyń jalpy kólemin 500 myń tonnaǵa deiin ulǵaitý josparda bar.
Mamandar eksporttyq baǵyttyń damýyna EAEO men Iran arasyndaǵy kelisim aiasyndaǵy jeńildetilgen saýda rejimi oń áser etip otyrǵanyn aitady. Sonymen qatar Aqtaý portynda maidy tsisternalardan tikelei kemelerge quiýǵa múmkindik beretin tehnikalyq infraqurylym paida bolǵan.
Alaida naryqtyń tolyqqandy damýyna kedergi de joq emes. Sarapshylar Aqtaý portynda arnaiy mai quiý terminalynyń bolmaýy eksport kólemin ulǵaitýǵa ázirge qolbailaý bolyp otyrǵanyn atap ótti.
