Qazaqstanda dári-dármek óndirisiniń artýy kútiledi. Bul týraly Úkimet otyrysynda aıtyldy, - dep habarlaıdy Dalanews.kz Úkimettiń baspasóz qyzmetine siltep.
QR Premer-mınıstri Oljas Bektenovtiń tóraǵalyǵymen ótken Úkimet otyrysynda densaýlyq saqtaý mınıstri Aqmaral Álnazarova Qazaqstannyń farmasevtıkalyq ónerkásibi 207 óndirýshini qamtıtynyn, onyń 43-i dárilik zattardy óndirýshiler ekenin aıtty.
2024 jyly otandyq farmasevtıkalyq ónim óndirý kólemi 124 mlrd teńgege deıin ulǵaıdy ósim 18%-dy qurady.
«2024 jyly uzaq merzimdi kelisimsharttar boıynsha farmasevtıkalyq ónimniń 702 túri satyp alyndy. 2025 jyly óndiris kólemin 1 728 deıin ulǵaıtý josparlanýda», - dep atap ótti Aqmaral Álnazarova.
Mınıstr ımportty almastyrý jónindegi jumystardy jalǵastyrý sheńberinde 2025 jyldan bastap qoldanystaǵy otandyq taýar óndirýshilerdi qoldaı otyryp shyǵarylatyn otandyq preparattardyń tizbesi keńeıtiletinin aıtty.
Jahandyq halyqaralyq farmasevtıkalyq kompanıalarmen yntymaqtastyq jandandyrylady, sondaı-aq, ofteık kelisimsharttardy engize otyryp, uzaq merzimdi sharttar jasasý talaptary qaıta qaralatyn bolady.
Densaýlyq saqtaý mınıstri Aqmaral Álnazarova halyqty dári-dármekpen qamtamasyz etý boıynsha qabyldanyp jatqan sharalar týraly da baıandady.
Onyń aıtýynsha, bıyl ambýlatorıalyq jáne stasıonarlyq deńgeıde dári-dármekpen qamtamasyz etýge respýblıkalyq búdjetten 474 mlrd teńge, al jergilikti búdjetten 26,7 mlrd teńge qarajat jumsaldy.
