Qazaqstan damý banki eks-prezident Nursultan Nazarbaevtyń burynǵy qudasy, kásipker Qairat Boranbaevqa tiesili holdingtiń qonaq úi keshenderi men SPA-ortalyqtary jobasyn qaraýdan bas tartty, dep habarlady Kursiv.media.
2021 jyldan beri QDB zaimyna úmitkerler tiziminde Medeu Park Hotel kompaniiasy da bolǵan, alaida osy aptada bank bul jobany tizimnen alyp tastaǵan. Bank bunyń sebebin "indikativ analizge qajetti qujattar tapsyrmady" dep túsindirgen.
Kursiv.media málimetinshe, Boranbaev qonaq úi kesheni qarajatynyń úshten ekisin Medeu Park Hotel kompaniiasy arqyly Qazaqstan damý bankinen alýdy kózdegen.
Byltyr Almatyda ótken investitsiia forýmynda Medeu Park Hotel kompaniiasynyń qarjy direktory Arman Ramazanov QDB-ten 10- 12,5 milliard teńge alýdy josparlaǵanyn aitqan.
Kursiv.media dereginshe, sovet zamanyndaǵy eski "Medeý" qonaq úii súrilip, onyń ornyna úsh qabatty ǵimarat salyna bastaǵan. Ol Medeu Park Hotel 2022 jylǵy jeltoqsanda ashylady dep josparlanǵan. Alaida nysan pasportyndaǵy aqparatta qurylys 2024 jylǵy naýryzda aiaqtalatyny jazylǵan.
Boranbaevqa tiesili taǵy bir kompaniia ótinishin Qazaqstan damý banki qabyldamady, dep habarlady basylym. Bul kompaniia Býtakovka shatqalynda Butakovka Wellness&SPA saýyqtyrý keshenin salýdy kózdegen. Qurylysqa 13 milliard teńge qajet. Qarajattyń bir bóligin kompaniia Qazaqstan damý bankinen alǵysy kelgen, dep jazdy Kursiv.media.
Qairat Boranbaev — eks-prezident Nursultan Nazarbaevtyń qyzy Dariǵa Nazarbaevanyń burynǵy qudasy. Ony qazaqstandyq Forbes eldegi yqpaldy bes kásipker qataryna engizgen.
Qazaqstanda Boranbaevqa "asa iri kólemde aqsha jymqyrdy" degen kúdikpen biyl naýryz aiynda ustaldy. Sodan keiin onyń Almatydaǵy parkingterdi basqaratyn eki kompaniiasy Almaty ákimdigine qaitaryldy. Buǵan qosa, Boranbaevtyń Qaraǵandy farmatsevtika kesheni sáýir aiynda reseilik "Spýtnik V" vaktsinasyn shyǵarýdy doǵardy.
