Almatyda "Birikken Ulttar Uiymynyń bólinýdi baqylaý jónindegi kúshteri" missiiasy quramynda qyzmet etý úshin Golan jotalaryna attanatyn úshinshi ulttyq bitimgerlik kontingentti saltanatty túrde shyǵaryp salý rásimi ótti, dep habarlaidy dalanews.kz.
Qorǵanys ministriniń tárbie jáne ideologiialyq jumys jónindegi orynbasary, general-maior Asqar Mustabekov Qazaqstannyń halyqaralyq qaýipsizdikti qoldaý isine qatysýynyń mańyzyna toqtaldy.
"Bitimgerlik - syrtqy saiasattyń basym baǵyttarynyń biri jáne Qazaqstannyń halyqaralyq qaýipsizdikke qosqan úlesi. Sizder elimizdiń abyroiyn asqaqtatyp, Birikken Ulttar Uiymynyń bitimgerlik missiiasyna qatysýǵa attanǵaly tursyzdar. Bul - memlekettiń, halyqaralyq qaýymdastyq pen jaqyndaryńyzdyń aldyndaǵy úlken jaýapkershilik", - dedi ol.
Budan soń úshinshi bitimgerlik kontingenttiń komandiri, podpolkovnik Iliias Almatov bastaǵan áskeriler platsta saltanatty sappen júrip ótti. Keiin Qarýly kúshterdiń 139 áskeri qyzmetshisi ekinshi kontingentti almastyrý úshin Almaty halyqaralyq áýejaiyna jol tartty.
Qazir 150-den asa qazaqstandyq bitimger Birikken Ulttar Uiymynyń Taiaý Shyǵystaǵy jáne Afrika kontinentindegi 7 missiiasyna áskeri baqylaýshy, shtab ofitseri jáne derbes áskeri kontingent retinde qatysyp jatyr. Livanda, Siriiada, Batys Saharada, Ońtústik Sýdanda, Kongo Demokratiialyq Respýblikasynda, Ortalyq Afrika Respýblikasyndaǵy BUU missiialarynda qazaqstandyq bitimgerler bar.
Qazaqstandyq bitimgerler atysty toqtatý rejimin qamtamasyz etý, patrýldeý, tosqaýyl beketterin kúzetý, jarylys qaýpi bar zattardy joiý, sondai-aq, BUU qyzmetkerlerin alyp júrý men evakýatsiialaý jónindegi mindetterdi oryndaidy. Ulttyq kontingenttiń buǵan deiingi eki quramy Golan jotalarynda qyzmet etken kezde barlyq mindetti oidaǵydai oryndaǵan.
