Qazaqstan tsifrlyq basqarý salasynda jahandyq arenadaǵy pozitsiialaryn nyǵaitýda. 2024 jylǵy UN E-Government Survey esebine sáikes, el elektrondy úkimetti damytý boiynsha álemdik reitingte 24-orynǵa kóterilip, ótken eseppen salystyrǵanda óz pozitsiiasyn 4 satyǵa jaqsartty.
Aita ketý kerek, bul Qazaqstannyń BUU reitingine qatysý tarihyndaǵy eń úzdik kórsetkishterdiń biri.
Reitingte BUU sarapshylary elektrondy qyzmetterdiń damýyn, adam kapitalyn jáne telekommýnikatsiialyq infraqurylymdy baǵalaidy.
«Bul bizdiń tsifrlandyrýdaǵy jáne tiimdi memlekettik basqarýǵa qol jetkizýdegi jetistikterimizdi kórsetetin mańyzdy kórsetkish. BUU reitingi eki jylda bir ret jasalady jáne ol 193 eldi baǵalap, elektrondy qyzmetterdiń damýy, adam kapitaly men telekommýnikatsiialyq infraqurylym siiaqty negizgi aspektilerdi eskeredi.
Bul jetistik — birlesken jumystyń nátijesi, jáne biz óz qyzmetterimizdi árbir qazaqstandyq úshin qoljetimdi, qaýipsiz jáne innovatsiialyq etý úshin jumysty jalǵastyra beremiz!», - dep atap ótti QR Tsifrlyq damý ministri Jaslan Mádiev.
Esepte negizgi kórsetkishter de atap ótilgen:
Qazaqstan óte joǵary EGDI kórsetkishi bar elder tobyna kiredi. Qazaqstan 24-oryndy ielenip, Izrailden keiingi oryndy alady jáne elektrondy úkimetti damytý indeksi (EGDI) óte joǵary elder qataryna kiredi.
Aǵymdaǵy jyldyń reitinginde Qazaqstannan keiingi oryndarda: Ýrýgvai (25 oryn), Shveitsariia (26 oryn), Túrkiia (27 oryn), Frantsiia (34 oryn), Qytai (35 oryn), Kanada (47 oryn) ornalasqan. 2024 jylǵy reiting 2022-2023 jyldary jinalǵan derekterge negizdelip, BUU-nyń 193 múshe memleketin baǵalaidy.
Onlain-qyzmetter boiynsha TOP-10. Qazaqstan onlain-qyzmetter indeksi (OSI) boiynsha 10-orynǵa ie bolyp, álemdik reiting kóshbasshylary – Ońtústik Koreia, Daniia jáne Estoniiamen qatar tur. Sondai-aq Qytai, Germaniia jáne Avstraliia siiaqty elderden ozyp, osy saladaǵy aldyńǵy qatarly elder qataryna kirdi.
TMD elderi arasynda kóshbasshy. Qazaqstan TMD elderi arasynda kóshbasshylyǵyn jalǵastyryp, Resei Federatsiiasynan (43-oryn), Armeniiadan (48-oryn), Ózbekstannan (63-oryn) jáne Ázerbaijannan (74-oryn) ozyp tur.
Teńizge shyǵa almaityn elder arasyndaǵy joǵary jetistikter (LLDC). Qazaqstan teńizge shyǵa almaityn elder arasynda 0.9009 EGDI indeksimen 1-orynǵa ie. Odan keiin Mońǵoliia, Armeniia jáne Ózbekstan keledi.
Telekommýnikatsiialyq infraqurylymdy damytý. Qazaqstan telekommýnikatsiialyq infraqurylym indeksi (TII) boiynsha óz pozitsiiasyn 23 orynǵa jaqsartyp, 41-oryndy ielendi.
Esepte sondai-aq, Qazaqstan tsifrlyq infraqurylymǵa belsendi túrde investitsiia salyp, jasandy intellekt, blokchein jáne zattar interneti (IoT) siiaqty ozyq tehnologiialardy engizý arqyly tsifrlyq transformatsiia salasynda aitarlyqtai ilgerileýge qol jetkizgeni atap ótilgen. Bul bastamalar basqarýdy jáne memlekettik qyzmet kórsetýdi túbegeili ózgertti, olardy qoljetimdi ári ashyq etti.
Ulttyq IKT jáne tsifrlyq saýattylyqty damytý strategiiasy, sondai-aq memlekettik qyzmetterdiń sapasyn jaqsartýǵa basa nazar aýdarý eldiń álemdik reitingterde odan ári ósýine jáne ony álemdegi tsifrlyq transformatsiia kóshbasshylarynyń biri retinde nyǵaitýǵa yqpal etýde.
QR TsDIAÓM baspasóz qyzmeti
