قازاقستان سيفرلىق باسقارۋ سالاسىندا جاھاندىق ارەناداعى پوزيسيالارىن نىعايتۋدا. 2024 جىلعى UN E-Government Survey ەسەبىنە سايكەس، ەل ەلەكتروندى ۇكىمەتتى دامىتۋ بويىنشا الەمدىك رەيتينگتە 24-ورىنعا كوتەرىلىپ، وتكەن ەسەپپەن سالىستىرعاندا ءوز پوزيسياسىن 4 ساتىعا جاقسارتتى.
ايتا كەتۋ كەرەك، بۇل قازاقستاننىڭ بۇۇ رەيتينگىنە قاتىسۋ تاريحىنداعى ەڭ ۇزدىك كورسەتكىشتەردىڭ ءبىرى.
رەيتينگتە بۇۇ ساراپشىلارى ەلەكتروندى قىزمەتتەردىڭ دامۋىن، ادام كاپيتالىن جانە تەلەكوممۋنيكاسيالىق ينفراقۇرىلىمدى باعالايدى.
«بۇل ءبىزدىڭ سيفرلاندىرۋداعى جانە ءتيىمدى مەملەكەتتىك باسقارۋعا قول جەتكىزۋدەگى جەتىستىكتەرىمىزدى كورسەتەتىن ماڭىزدى كورسەتكىش. بۇۇ رەيتينگى ەكى جىلدا ءبىر رەت جاسالادى جانە ول 193 ەلدى باعالاپ، ەلەكتروندى قىزمەتتەردىڭ دامۋى، ادام كاپيتالى مەن تەلەكوممۋنيكاسيالىق ينفراقۇرىلىم سياقتى نەگىزگى اسپەكتىلەردى ەسكەرەدى.
بۇل جەتىستىك — بىرلەسكەن جۇمىستىڭ ناتيجەسى، جانە ءبىز ءوز قىزمەتتەرىمىزدى ءاربىر قازاقستاندىق ءۇشىن قولجەتىمدى، ءقاۋىپسىز جانە يننوۆاسيالىق ەتۋ ءۇشىن جۇمىستى جالعاستىرا بەرەمىز!»، - دەپ اتاپ ءوتتى ق ر سيفرلىق دامۋ ءمينيسترى جاسلان مادييەۆ.
ەسەپتە نەگىزگى كورسەتكىشتەر دە اتاپ وتىلگەن:
قازاقستان وتە جوعارى EGDI كورسەتكىشى بار ەلدەر توبىنا كىرەدى. قازاقستان 24-ورىندى يەلەنىپ، يزرايلدەن كەيىنگى ورىندى الادى جانە ەلەكتروندى ۇكىمەتتى دامىتۋ يندەكسى (EGDI) وتە جوعارى ەلدەر قاتارىنا كىرەدى.
اعىمداعى جىلدىڭ رەيتينگىندە قازاقستاننان كەيىنگى ورىنداردا: ۋرۋگۆاي (25 ورىن)، شۆەيساريا (26 ورىن)، تۇركيا (27 ورىن)، فرانسيا (34 ورىن)، جۇڭگو (35 ورىن)، كانادا (47 ورىن) ورنالاسقان. 2024 جىلعى رەيتينگ 2022-2023 جىلدارى جينالعان دەرەكتەرگە نەگىزدەلىپ، بۇۇ-نىڭ 193 مۇشە مەملەكەتىن باعالايدى.
ونلاين-قىزمەتتەر بويىنشا توپ-10. قازاقستان ونلاين-قىزمەتتەر يندەكسى (OSI) بويىنشا 10-ورىنعا يە بولىپ، الەمدىك رەيتينگ كوشباسشىلارى – وڭتۇستىك كورەيا، دانيا جانە ەستونيامەن قاتار تۇر. سونداي-اق جۇڭگو، گەرمانيا جانە اۆستراليا سياقتى ەلدەردەن وزىپ، وسى سالاداعى الدىڭعى قاتارلى ەلدەر قاتارىنا كىردى.
تمد ەلدەرى اراسىندا كوشباسشى. قازاقستان تمد ەلدەرى اراسىندا كوشباسشىلىعىن جالعاستىرىپ، رەسەي فەدەراسياسىنان (43-ورىن)، ارمەنيادان (48-ورىن)، وزبەكستاننان (63-ورىن) جانە ازەربايجاننان (74-ورىن) وزىپ تۇر.
تەڭىزگە شىعا المايتىن ەلدەر اراسىنداعى جوعارى جەتىستىكتەر (LLDC). قازاقستان تەڭىزگە شىعا المايتىن ەلدەر اراسىندا 0.9009 EGDI يندەكسىمەن 1-ورىنعا يە. ودان كەيىن موڭعوليا، ارمەنيا جانە وزبەكستان كەلەدى.
تەلەكوممۋنيكاسيالىق ينفراقۇرىلىمدى دامىتۋ. قازاقستان تەلەكوممۋنيكاسيالىق ينفراقۇرىلىم يندەكسى (TII) بويىنشا ءوز پوزيسياسىن 23 ورىنعا جاقسارتىپ، 41-ورىندى يەلەندى.
ەسەپتە سونداي-اق، قازاقستان سيفرلىق ينفراقۇرىلىمعا بەلسەندى تۇردە ينۆەستيسيا سالىپ، جاساندى ينتەللەكت، بلوكچەين جانە زاتتار ينتەرنەتى (IoT) سياقتى وزىق تەحنولوگيالاردى ەنگىزۋ ارقىلى سيفرلىق ترانسفورماسيا سالاسىندا ايتارلىقتاي ىلگەرىلەۋگە قول جەتكىزگەنى اتاپ وتىلگەن. بۇل باستامالار باسقارۋدى جانە مەملەكەتتىك قىزمەت كورسەتۋدى تۇبەگەيلى وزگەرتتى، ولاردى قولجەتىمدى ءارى اشىق ەتتى.
ۇلتتىق يكت جانە سيفرلىق ساۋاتتىلىقتى دامىتۋ ستراتەگياسى، سونداي-اق مەملەكەتتىك قىزمەتتەردىڭ ساپاسىن جاقسارتۋعا باسا نازار اۋدارۋ ەلدىڭ الەمدىك رەيتينگتەردە ودان ءارى وسۋىنە جانە ونى الەمدەگى سيفرلىق ترانسفورماسيا كوشباسشىلارىنىڭ ءبىرى رەتىندە نىعايتۋعا ىقپال ەتۋدە.
ق ر ءسدياوم باسپا ءسوز قىزمەتى
