Eńbek jáne halyqty áleýmettik qorǵaý birinshi vitse-ministri Asqarbek Ertaev búgin Senat dálizinde jýrnalister qoiǵan suraqqa jaýap bere otyryp, qansha qazaqstandyqtyń jumys isteý úshin shetelge ketkenin aitty, dep habarlaidy Dalanews.kz.
Ertaev búgingi tańda shetelde barlyǵy 126 myń qazaqstandyq eńbek etip júrgenin jetkizdi. Atap aitqanda, onyń ishinde:
- 102 myńy - Reseide,
- 15 myńy – Ońtústik Koreiada,
- 2 myńy - Ulybritaniia men EO elderinde.
"Bul arada mynandai taǵy bir másele bar. Biz barlyq eldermen jumyspen qamtýdy retteý týraly sharttarǵa otyrmaǵanbyz. Ulybritaniiamen biz biyl osyndai memorandým jasastyq. Ońtústik Koreiamen aradaǵy kelisim áli qaralýda, eki jyl boldy, osy eldegi saiasi jaǵdaiǵa bailanysty kidirister bar. Kúzde qaita jandanady dep oilaimyz, biz bul kelisimdi sońyna deiin jetkizýge tyrysamyz, óitkeni ondaǵy 15 myń azamattyń 11 myńy zańsyz jumys istep júr. Bul arada mindetti túrde naqty sharalar qabyldaý qajet", - dedi birinshi vitse-ministr.
Onyń aitýynsha, korei tarapy onda zańsyz júrgen azamattarymyzǵa qatysty sharalar qabyldaýdy talap etýde.
"Biz qazir kelissózder júrgizip jatyrmyz. Biz ótinim berip qoidyq, kelesi tarap ony qarastyrýda. Meniń oiymsha, jyl sońyna deiin biz Ońtústik Koreia men eńbek ministrligindegi áriptesterimizben bul kelisimdi birjaqty etip qalamyz", - dep sózin túiindeidi ol.
