Astana qalalyq sotynyń ákimshilik ister jónindegi sot alqasy brend saǵat tańbasyna qatysty daýly iste birinshi saty sotynyń sheshimin zańdy jáne negizdi dep tapty. Atap aitqanda, 2024 jylǵy 20 aqpanda QR Ádilet ministrliginiń apelliatsiialyq keńesiniń Qazaqstan azamatyna tiesili C. taýar belgisiniń kúshin joiýdan bas tartý sheshimi jáne C. taýar belgisin tirkeýdi zańsyz dep tanyldy, dep habarlaidy Dalanews.kz.
Aita ketsek, 2023 jylǵy 19 maýsymda Qazaqstan azamatyna C. taýar belgisi tirkelgen. Odan keiin, Rolex SA shveitsariialyq kompaniiasy tarapynan osy taýar belgisiniń kúshin joiý boiynsha aryz túsip, onda C. jáne COSMOGRAPH taýarlyq belgileriniń uqsas ekendigin, ol taýarǵa nemese ony óndirýshige qatysty tutynýshylardy adastyrýǵa alyp kelýi múmkin dep kórsetilgen.
2024 jylǵy 20 aqpanda QR Ádilet ministrliginiń apelliatsiialyq keńesiniń sheshimimen C. taýar belgisiniń kúshin joiýdan bas tartyldy. Sheshimge Rolex SA kezekti ret shaǵym keltirdi.
"Sot isti qaraý kezinde Rolex SA kompaniiasy 1961 jylǵy 04 mamyrdan beri 14-synypty taýarlarǵa, atap aitqanda saǵattardyń barlyq túrleri men olardyń quramdas bólikterine qatysty basymdyǵy bar halyqaralyq tirkeý boiynsha COSMOGRAPH taýar belgisiniń iesi bolyp tabylatynyn anyqtady.C. taýar belgisi keiinirek jáne saǵatpen bailanysty taýarlar men qyzmetterge qatysty tirkelgen. Taýar belgisinde C. bolǵanyna qaramastan, COSMOGRAPH sózindegi keibir grafika men qosymsha aiaqtalý maǵynasy boiynsha negizgi sóz C. sózi bolyp tabylady. Sot C. jáne COSMOGRAPH taýarlyq belgileriniń uqsastyǵy joǵary, bul jaǵdai taýarǵa nemese ony óndirýshige qatysty adastyrýǵa alyp kelýi múmkin degen qorytyndyǵa kelip, QR Ádilet ministrliginiń apelliatsiialyq keńesiniń 2024 jylǵy 20 aqpandaǵy sheshimin jáne "C." taýar belgisin tirkeýdi zańsyz dep tanydy", delingen sot habarlamasynda.
Jergilikti sottardyń sot aktileri zańdy kúshine engen joq.
