Qazaqstannyń azamattyq aviatsiia salasyndaǵy halyqaralyq standarttarǵa sáikestik kórsetkishi 95,7 paiyzǵa jetti. Osy nátije Halyqaralyq azamattyq aviatsiia uiymynyń (IKAO) bas hatshysy Hýan Karlos Salasardyń Qazaqstannyń Aviatsiialyq ákimshiligine resmi sapary kezinde talqylandy, dep habarlaidy dalanews.kz.
IKAO basshysy Qazaqstanǵa alǵash ret resmi saparmen keldi. Kezdesýde aviatsiialyq qaýipsizdik salasyndaǵy halyqaralyq talaptar oryndalýy, memlekettik baqylaýdy jetildirý jáne Qazaqstannyń azamattyq aviatsiiasyn 2050 jylǵa deiin damytý jospary talqylandy.
IKAO talaptaryna sáikestik kórsetkishi 95,7 paiyzǵa jetýi Qazaqstandy aviatsiialyq qaýipsizdik standarttaryn oryndaý deńgeii joǵary 20 eldiń qataryna qosty. Bul kórsetkish áýe apattarynyń sanyn emes, azamattyq aviatsiiany zańsyz áreketterden qorǵaýǵa baǵyttalǵan talaptar oryndalýyn baǵalaidy.
IKAO bas hatshysy Hýan Karlos Salasar qazaqstandyq aviatsiia mamandarynyń eńbegin atap ótip, halyqaralyq standarttardy oryndaýdyń mańyzyn aitty.
Uiym ókilderi joǵary kórsetkishke qol jetkizýmen shektelmei, aldaǵy halyqaralyq tekseristerge muqiiat daiyndalý qajet ekenin de eskertti. EUR/NAT óńirlik biýrosynyń direktory Nikolas Rallo talaptar oryndalýy qujattarmen rastalýy keregin aitty.
Qazaqstannyń Aviatsiialyq ákimshiligi aldaǵy ýaqytta AQSh Federaldyq aviatsiia basqarmasynyń IASA baǵdarlamasy jáne IKAO-nyń USOAP aýditi aiasyndaǵy tekseristerge daiyndalmaq.
