Қазақстанның азаматтық авиация саласындағы халықаралық стандарттарға сәйкестік көрсеткіші 95,7 пайызға жетті. Осы нәтиже Халықаралық азаматтық авиация ұйымының (ИКАО) бас хатшысы Хуан Карлос Саласардың Қазақстанның Авиациялық әкімшілігіне ресми сапары кезінде талқыланды, деп хабарлайды dalanews.kz.
ИКАО басшысы Қазақстанға алғаш рет ресми сапармен келді. Кездесуде авиациялық қауіпсіздік саласындағы халықаралық талаптар орындалуы, мемлекеттік бақылауды жетілдіру және Қазақстанның азаматтық авиациясын 2050 жылға дейін дамыту жоспары талқыланды.
ИКАО талаптарына сәйкестік көрсеткіші 95,7 пайызға жетуі Қазақстанды авиациялық қауіпсіздік стандарттарын орындау деңгейі жоғары 20 елдің қатарына қосты. Бұл көрсеткіш әуе апаттарының санын емес, азаматтық авиацияны заңсыз әрекеттерден қорғауға бағытталған талаптар орындалуын бағалайды.
ИКАО бас хатшысы Хуан Карлос Саласар қазақстандық авиация мамандарының еңбегін атап өтіп, халықаралық стандарттарды орындаудың маңызын айтты.
Ұйым өкілдері жоғары көрсеткішке қол жеткізумен шектелмей, алдағы халықаралық тексерістерге мұқият дайындалу қажет екенін де ескертті. EUR/NAT өңірлік бюросының директоры Николас Ралло талаптар орындалуы құжаттармен расталуы керегін айтты.
Қазақстанның Авиациялық әкімшілігі алдағы уақытта АҚШ Федералдық авиация басқармасының IASA бағдарламасы және ИКАО-ның USOAP аудиті аясындағы тексерістерге дайындалмақ.
