BUU shaqyrýyna sáıkes 2024 jylǵy naýryzdan bastap "BUU-nyń Golan bıiktikterindegi bólinýdi baqylaý jónindegi kúshteri" mısıasyna áskerı tehnıkasy, qarý-jaraǵy jáne rezerv rotasy retinde múlki bar 139 áskerı qyzmetshini Qazaqstannyń alǵashqy derbes ulttyq bitimgershilik kontıngentine ornalastyrý josparlanyp otyr. Ol úshin taraptardyń mindettemelerin, sondaı-aq, kontıngenttiń mısıaǵa qatysýyn qarjylyq jáne materıaldyq-tehnıkalyq qamtamasyz etý máselelerin aıqyndaıtyn Birikken Ulttar Uıymymen halyqaralyq shart jasalady.
Parlament BUU-nyń birneshe mısıasyna qatysý úshin 430 adamnan aspaýǵa tıis QR Qarýly Kúshteriniń áskerı qyzmetshisin jiberýdi maquldady.
Olar - " BUU-nyń Golan bıiktikterindegi bólinýdi baqylaý kúshteri", "BUU-nyń bitimgershilik sharttarynyń oryndalýyn baqylaý organy" (UNTSO, Palestına-Izraıl), "BUU-nyń Ońtústik Sýdan Respýblıkasyndaǵy mısıasy" (UNMISS, Ońtústik Sýdan) jáne "BUU-nyń ýaqytsha qaýipsizdik jáne Abe kúshteri" (UNISFA, Sýdan).
2014 jyldan bastap 67 qazaqstandyq ofıser Batys Sahara, Kot-d ' Ivýar, Malı, Ortalyq Afrıka Respýblıkasy jáne Lıvandaǵy BUU mısıalaryna qatysty. 2018 jyldan bastap 538 qazaqstandyq áskerı qyzmetshi bitimgershilik bólimshesiniń quramynda "BUU-nyń Lıvandaǵy ýaqytsha kúshteri" mısıasyna qatysty. Qazir Batys Saharada alty qazaqstandyq ofıser, Ortalyq Afrıka Respýblıkasynda eki ofıser, Kongo Demokratıalyq Respýblıkasynda eki ofıser, Lıvanda toǵyz áskerı qyzmetshi BUU mısıalarynda qyzmet etedi.
"Ulttyq kontıngentti qalyptastyrý kezinde áskerı qyzmetshilerdi irikteý úshin Qorǵanys mınıstrligine vedimistik baǵynysty bólimshelerdiń, áskerı bólimderdiń, quramalardyń, áskerı oqý oryndarynyń komısıalary taǵaıyndalady. Áskerı qyzmetshilerdi daıarlaý Almatyda ornalasqan QR Qorǵanys mınıstrliginiń bitimgershilik operasıalar ortalyǵynda júzege asyrylady. Ortalyq bazasynda áskerı qyzmetshiler bitimgershilik daıyndyq boıynsha qarqyndy kýrstan ótedi. Bolashaq bitimgerler aǵylshyn tilin, dalalyq medısınany, radıobaılanysty, shahtalar, qoldan jasalǵan jarylǵysh qurylǵylar men jarylmaǵan snarádtar týraly bilimdi, kúsh qoldaný erejelerin, sondaı-aq, halyqaralyq jáne gýmanıtarlyq quqyq normalaryn qarqyndy meńgerip jatyr", - dedi qorǵanys mınıstri.
Sýret: gov.kz
