بۇۇ شاقىرۋىنا سايكەس 2024 جىلعى ناۋرىزدان باستاپ "بۇۇ-نىڭ گولان بيىكتىكتەرىندەگى ءبولىنۋدى باقىلاۋ جونىندەگى كۇشتەرى" ميسسياسىنا اسكەري تەحنيكاسى، قارۋ-جاراعى جانە رەزەرۆ روتاسى رەتىندە مۇلكى بار 139 اسكەري قىزمەتشىنى قازاقستاننىڭ العاشقى دەربەس ۇلتتىق بىتىمگەرشىلىك كونتينگەنتىنە ورنالاستىرۋ جوسپارلانىپ وتىر. ول ءۇشىن تاراپتاردىڭ مىندەتتەمەلەرىن، سونداي-اق، كونتينگەنتتىڭ ميسسياعا قاتىسۋىن قارجىلىق جانە ماتەريالدىق-تەحنيكالىق قامتاماسىز ەتۋ ماسەلەلەرىن ايقىندايتىن بىرىككەن ۇلتتار ۇيىمىمەن حالىقارالىق شارت جاسالادى.
پارلامەنت بۇۇ-نىڭ بىرنەشە ميسسياسىنا قاتىسۋ ءۇشىن 430 ادامنان اسپاۋعا ءتيىس ق ر قارۋلى كۇشتەرىنىڭ اسكەري قىزمەتشىسىن جىبەرۋدى ماقۇلدادى.
ولار - " بۇۇ-نىڭ گولان بيىكتىكتەرىندەگى ءبولىنۋدى باقىلاۋ كۇشتەرى"، "بۇۇ-نىڭ بىتىمگەرشىلىك شارتتارىنىڭ ورىندالۋىن باقىلاۋ ورگانى" (UNTSO، پالەستينا-يزرايل)، "بۇۇ-نىڭ وڭتۇستىك سۋدان رەسپۋبليكاسىنداعى ميسسياسى" (UNMISS، وڭتۇستىك سۋدان) جانە "بۇۇ-نىڭ ۋاقىتشا قاۋىپسىزدىك جانە ابە كۇشتەرى" (UNISFA، سۋدان).
2014 جىلدان باستاپ 67 قازاقستاندىق وفيسەر باتىس ساحارا، كوت-د ' يۆۋار، مالي، ورتالىق افريكا رەسپۋبليكاسى جانە ليۆانداعى بۇۇ ميسسيالارىنا قاتىستى. 2018 جىلدان باستاپ 538 قازاقستاندىق اسكەري قىزمەتشى بىتىمگەرشىلىك بولىمشەسىنىڭ قۇرامىندا "بۇۇ-نىڭ ليۆانداعى ۋاقىتشا كۇشتەرى" ميسسياسىنا قاتىستى. ءقازىر باتىس ساحارادا التى قازاقستاندىق وفيسەر، ورتالىق افريكا رەسپۋبليكاسىندا ەكى وفيسەر، كونگو دەموكراتيالىق رەسپۋبليكاسىندا ەكى وفيسەر، ليۆاندا توعىز اسكەري قىزمەتشى بۇۇ ميسسيالارىندا قىزمەت ەتەدى.
"ۇلتتىق كونتينگەنتتى قالىپتاستىرۋ كەزىندە اسكەري قىزمەتشىلەردى ىرىكتەۋ ءۇشىن قورعانىس مينيسترلىگىنە ۆەدومستۆولىق باعىنىستى بولىمشەلەردىڭ، اسكەري بولىمدەردىڭ، قۇرامالاردىڭ، اسكەري وقۋ ورىندارىنىڭ كوميسسيالارى تاعايىندالادى. اسكەري قىزمەتشىلەردى دايارلاۋ الماتىدا ورنالاسقان ق ر قورعانىس مينيسترلىگىنىڭ بىتىمگەرشىلىك وپەراسيالار ورتالىعىندا جۇزەگە اسىرىلادى. ورتالىق بازاسىندا اسكەري قىزمەتشىلەر بىتىمگەرشىلىك دايىندىق بويىنشا قارقىندى كۋرستان وتەدى. بولاشاق بىتىمگەرلەر اعىلشىن ءتىلىن، دالالىق مەديسينانى، راديوبايلانىستى، شاحتالار، قولدان جاسالعان جارىلعىش قۇرىلعىلار مەن جارىلماعان سناريادتار تۋرالى ءبىلىمدى، كۇش قولدانۋ ەرەجەلەرىن، سونداي-اق، حالىقارالىق جانە گۋمانيتارلىق قۇقىق نورمالارىن قارقىندى مەڭگەرىپ جاتىر"، - دەدى قورعانىس ءمينيسترى.
سۋرەت: gov.kz
