Qazaqstannyń munai óńdeý qýaty 2033 jylǵa qarai jylyna 40 mln tonnaǵa deiin ósedi, dep habarlaidy Dalanews.kz.
Energetikalyq sektordy nyǵaitý úshin Úkimet munai óńdeý qýatyn aǵymdaǵy 18,4 tonnadan jylyna 40 mln tonnaǵa deiin ulǵaitý jónindegi keshendi jospardy júzege asyrýda. Jumys istep turǵan MÓZ-di jańǵyrtý barysy jáne qýaty 10 mln tonna jańa zaýyt salýǵa daiyndyq týraly energetika vitse-ministri Qaiyrhan Tutqyshbaev baiandady.
Atap aitqanda, ol jumys istep turǵan munai óńdeý zaýyttaryn josparly túrde keńeitý 2030 jylǵa qarai dizel otynynyń tapshylyǵyn joiýǵa múmkindik beretinin, al 2033 jyly tórtinshi zaýytty iske qosý aviakerosinge degen qajettilikti tolyq óteitinin jáne K5 standartyndaǵy joǵary sapaly munai ónimderin eksportqa shyǵarýdy qamtamasyz etetinin habarlady.
Sonymen qatar Qashaǵan ken ornynda gaz óńdeý qýattaryn arttyrý jumystary júrgizilýde. 2026 jyldyń sońynda GÓZ-1-diń iske qosylýy jylyna 2,5 mlrd tekshe metr taýarlyq gaz óndirýdi qamtamasyz etedi. Munai-gaz himiiasy sektorynda basty nazar tereń óńdeýge baǵyttalǵan: polietilen, býtadien jáne karbamid shyǵarý jónindegi jobalardy júzege asyrý shikizatpen salystyrǵanda ónim qunyn 20 esege deiin arttyrýǵa múmkindik beredi. 2026 jyly Pavlodar oblysyndaǵy alkilat óndiretin zaýyttyń qurylysy odan ári qarqyndy túrde jalǵasady, bul elimizdiń ishki qajettilikterin 100% qamtamasyz etedi.
Memleket basshysynyń tapsyrmasyn oryndaý aiasynda 2026-2033 jyldary elimizde qýaty jylyna 10 mln tonna bolatyn jańa MÓZ-diń tehnikalyq-ekonomikalyq negizderin ázirleý, jobalaý, salý jáne iske qosý boiynsha jumystaryn júzege asyra otyryp, qaita óńdeý qýatyn jylyna 40 mln tonnaǵa deiin jetkizý kózdelgen.
Keńeitý jobalary munai ónimderiniń tapshylyǵyn kezeń-kezeńimen azaitýǵa múmkindik beredi. 2033 jyly tórtinshi zaýyt esebinen aviakerosin tapshylyǵy joiylyp, kórshi elderge JJM eksporty bastalady. Jumys istep turǵan zaýyttarda qaita óńdeý úlesi 94%-ǵa deiin ósedi, al otyn sapasy K5 standartyna deiin artady, - dedi Qaiyrhan Tutqyshbaev.
