قازاقستاننىڭ مۇناي وڭدەۋ قۋاتى 2033 جىلعا قاراي جىلىنا 40 ملن تونناعا دەيىن وسەدى، دەپ حابارلايدى Dalanews.kz.
ەنەرگەتيكالىق سەكتوردى نىعايتۋ ءۇشىن ۇكىمەت مۇناي وڭدەۋ قۋاتىن اعىمداعى 18،4 توننادان جىلىنا 40 ملن تونناعا دەيىن ۇلعايتۋ جونىندەگى كەشەندى جوسپاردى جۇزەگە اسىرۋدا. جۇمىس ىستەپ تۇرعان ءموز-دى جاڭعىرتۋ بارىسى جانە قۋاتى 10 ملن توننا جاڭا زاۋىت سالۋعا دايىندىق تۋرالى ەنەرگەتيكا ۆيسە-مينيسترى قايىرحان تۇتقىشبايەۆ باياندادى.
اتاپ ايتقاندا، ول جۇمىس ىستەپ تۇرعان مۇناي وڭدەۋ زاۋىتتارىن جوسپارلى تۇردە كەڭەيتۋ 2030 جىلعا قاراي ديزەل وتىنىنىڭ تاپشىلىعىن جويۋعا مۇمكىندىك بەرەتىنىن، ال 2033 جىلى ءتورتىنشى زاۋىتتى ىسكە قوسۋ اۆياكەروسينگە دەگەن قاجەتتىلىكتى تولىق وتەيتىنىن جانە ك5 ستاندارتىنداعى جوعارى ساپالى مۇناي ونىمدەرىن ەكسپورتقا شىعارۋدى قامتاماسىز ەتەتىنىن حابارلادى.
سونىمەن قاتار قاشاعان كەن ورنىندا گاز وڭدەۋ قۋاتتارىن ارتتىرۋ جۇمىستارى جۇرگىزىلۋدە. 2026 جىلدىڭ سوڭىندا گوز-1ء-دىڭ ىسكە قوسىلۋى جىلىنا 2،5 ملرد تەكشە مەتر تاۋارلىق گاز ءوندىرۋدى قامتاماسىز ەتەدى. مۇناي-گاز حيمياسى سەكتورىندا باستى نازار تەرەڭ وڭدەۋگە باعىتتالعان: پوليەتيلەن، بۋتاديەن جانە كارباميد شىعارۋ جونىندەگى جوبالاردى جۇزەگە اسىرۋ شيكىزاتپەن سالىستىرعاندا ءونىم قۇنىن 20 ەسەگە دەيىن ارتتىرۋعا مۇمكىندىك بەرەدى. 2026 جىلى پاۆلودار وبلىسىنداعى الكيلات وندىرەتىن زاۋىتتىڭ قۇرىلىسى ودان ءارى قارقىندى تۇردە جالعاسادى، بۇل ەلىمىزدىڭ ىشكى قاجەتتىلىكتەرىن 100% قامتاماسىز ەتەدى.
مەملەكەت باسشىسىنىڭ تاپسىرماسىن ورىنداۋ اياسىندا 2026-2033 جىلدارى ەلىمىزدە قۋاتى جىلىنا 10 ملن توننا بولاتىن جاڭا ءموز-دىڭ تەحنيكالىق-ەكونوميكالىق نەگىزدەرىن ازىرلەۋ، جوبالاۋ، سالۋ جانە ىسكە قوسۋ بويىنشا جۇمىستارىن جۇزەگە اسىرا وتىرىپ، قايتا وڭدەۋ قۋاتىن جىلىنا 40 ملن تونناعا دەيىن جەتكىزۋ كوزدەلگەن.
كەڭەيتۋ جوبالارى مۇناي ونىمدەرىنىڭ تاپشىلىعىن كەزەڭ-كەزەڭىمەن ازايتۋعا مۇمكىندىك بەرەدى. 2033 جىلى ءتورتىنشى زاۋىت ەسەبىنەن اۆياكەروسين تاپشىلىعى جويىلىپ، كورشى ەلدەرگە ججم ەكسپورتى باستالادى. جۇمىس ىستەپ تۇرعان زاۋىتتاردا قايتا وڭدەۋ ۇلەسى 94%-عا دەيىن وسەدى، ال وتىن ساپاسى ك5 ستاندارتىنا دەيىن ارتادى، - دەدى قايىرحان تۇتقىشبايەۆ.
