Oryssha oilaityndar men oryssha sóileitinderdiń bul kisini sýqany súimeidi. Júrgen jeri daý deidi. Biraq, bul daýdy oryndy kóteretini, quqyǵy taptalyp otyrǵasyn aitatynyn eskere bermeidi. Bul joly da solai bolypty. Ult janashyry poiyzdaǵy jolaýshy tekseristeri tek orys tilinde júretinin synǵa alypty jáne jón aityp otyr. Biz ańǵara bermeitin, qazaq tili áli tumsyq tyǵa qoimaǵan salalarda resmi tildiń dáýreni júrip tur. Bul týraly Rýza Beisenbaitegi óziniń jelidegi paraqshasynda jazǵan eken.
Premer ministr Baqytjan Saǵyntaevtyń,
Qorǵanys ministri Sáken Jasuzaqovtyń,
QR UQK Shekara qyzmeti direktory
general-maior Darhan Dilmanovtyń nazaryna!
Men…
oqtyn-oqtyn Pavlodar – Óskemen baǵytyndaǵy poiyzdarmen júremin. Baǵytta 2 ret, shekarada ornalasqan Aýyl jáne Shemonaiha stansalarynda jolaýshy tekseristeri tek RF tilinde!
Shamamen, 2 jyldai buryn tekseris júrgizetin jigitterge: «Kelesi joly jolaýshylarǵa — „memtilde tekseris júrgizbeseńizder, qujattarymdy kórsetpeimin„, — degenmin.
Qańtardyń 21-inde 376/375 Astana-Leninogor baǵytyndaǵy poiyzda, sol jigitterdiń biri, «Dokýmenty prigotovili …» dep, áiteýir, oryssha tekserip kele jatty. Meniń kýpeme (platskart, 0 vagon) kelgende ǵana, «Zdravstvýite», ekinshi kezekte «Sálemetsizbe» dedi. Men, birinshi osy memlekettiń tilinde amandasýy kerek ekenin eskertip, jáne jyldar boiy tekseris tek orys tilinde júrgizilip kele jatqanyna narazylyq retinde qujatymdy kórsetýden bas tarttym da, bastyǵyn shaqyrttym.
Umytpasam, ol da burynnan tekserip júretin jigit, keldi de ózin tolyǵymen orys tilinde tanystyrdy. Táýelsiz memeket ekenimiz shyn bolsa, bul zańbuzýshylyq. Odan onyń ústindegi basshysyn shaqyrýdy talap etkenimde (bolǵandy videoǵa túsirdim) ǵana, qazaqsha sóilep bastady da, beinekameraǵa túsiretin adamdy shaqyrtty jáne qujatyńyzdy kórsetpeseńiz, poiyzdy ustap turamyz dedi.
Eshkim keshigip barýdy qalamaidy, sondyqtan qujatymdy kórsetýge májbúr boldym. 5-6 minóttei basyńyzdy tómen túsirińiz, joǵary qarańyz, t.s.s., uzaq ýaqyt qarady, qujatymmen salystyryp. Ómirimde birinshi ret sonsha ýaqyt salystyrǵany…
Ashýlanǵan túrleri
14.44-te poiyz júrdi. Biraq birneshe min. keiin taǵy toqtady. Sol ýaqytta poiyz brigadiri kelip: «poiyzdy shekarashylar siz úshin ustap tur, jolaýshylardan siz týraly túsinikteme alyp jatyr» dedi. Poiyz keste boiynsha 14.50 júrýi kerek bolatyn, biraq qazaq tilin talap etkenim úshin (onyń aldynda jyldar boiy), óshterin menen alyp, poiyzdy kestesinen 24 minót keshiktirdi dep esepteimin. Jáne sonysyn jýyp-shaiý úshin meniń janymdaǵy 2 jolaýshyny meniń kózimshe maǵan qarsy túsinikteme berýge (jazýǵa) májbúrledi, múmkin, basqalaryna da sondai qysym jasaǵan shyǵar (ol jaǵyn bilmeimin), óitkeni olardy jolserikter kýpesine alyp ketken bolatyn.
Qurmetti Baqytjan Ábdiruly, Sáken Ádilhanuly, Darhan Aitqaliuly!
QR qaýipsizdigin qamtamasyz etetin shekara áskeri nelikten óz jumystaryn RF tilinde júrgizedi? Álde sizderdiń qyzmetterińiz sol memlekettiń quzyryna kóshti me? QR konstitýtsiiasyna sáikes memtil, 22 jyl qazaq tili ekenin bilmeitin saýatsyz ba, shekara áskeri?
Ne qasaqana memleketti, áli kúnge RF bodany ispettes kórsetip otyrǵan opasyzdyq pa shekara áskeri tarapynan? Sonda bul ásker kimge baǵynady? Shyndyqty ashyp aitýdy talap etemin.
Óz basyma keler bolsaq, keri oralǵanda, bolashaqta da, meili shekarashylar poiyzdy sótkelep toqtatsyn, meili, kúsh kórsetip alyp ketsin, amandasýdan bastalatyn tekseris, birinshi memtilde júrgizilmese, qujattarymdy kórsetýden bas tartamyn.
