Qazaq tiliniń mártebesi týraly qoǵamdyq pikirtalastar jiilep turǵan shaqta ánshi Rýslan Jaiyqbaev áleýmettik jelide aitqan daýly pikirimen eldiń ashýyna tidi. Ol qazaq tilinde sóileýdi talap etken azamattardy «sóileshnikter» dep atap, olardy «shahtaǵa aparyp, sol jerde ǵana sóilesýge» jóneltýdi usynǵan, dep habarlaidy Dalanews.kz.
Jaiyqbaev Instagram jelisindegi paraqshasynda bylai dep jazǵan:
«Sóileshnikterdi aidaladaǵy shahtaǵa aparyp tastaý kerek. Sol jaqtan shyqpai, bir-birimen sol jerde sóilese bersin. Proviziiany retpen berip, kezekpen ǵana jýyndyrý qajet. Komendanttyq saǵat engizse – másele sheshiledi».
Áleýmettik jelilerde ánshiniń aty atalǵaly beri onyń Ne Prosto Orchestra quramynda bolǵany jaily aqparat tarady. Osyǵan bailanysty orkestrdiń resmi paraqshasynda málimdeme jariialandy:
"Qurmetti bizdiń tyńdaýshylar men oqyrmandar! Áleýmettik jelilerde vokalist týraly týyndaǵan qazirgi jaǵdai bizdiń de nazarymyzdan qalmady. Ne Prosto Orchestra ártúrli oryndaýshylarmen bir rettik joba negizinde jumys isteidi. Kontsert aiasynda shaqyrylǵan oryndaýshylar orkestrdiń shtattyq qyzmetkerleri emes jáne bul olardyń resmi jumys ornyn bildirmeidi.
Olardyń jeke pikirleri — olardyń jeke jaýapkershiligi. Orkestrdiń resmi pozitsiiasyn, sondai-aq kompaniianyń maqsattary men kózqarasyn tek bizdiń resmi paraqshamyz jáne orkestr jetekshisi Madiiar Toiboldy ǵana aqparat bere alady jáne rastai alady. Biz kez kelgen diskriminatsiia men jeke kórýshilik túrlerin aiyptaimyz. Biz úshin mýzyka — bul qurmet pen birlik keńistigi!", deidi olar.
Orkestr málimdemesinde Jaiyqbaevtyń endigi ýaqytta toptyń kontsertterine shaqyrylmaitynyn da habarlady.
Eske salaiyq, buǵan deiin áleýmettik jelilerde Magnum sýpermarketter jelisiniń kýreri jumystan shyǵarylýy úlken talqyǵa tústi. Bul jaǵdai kýrer klientten qazaq tilinde sóileýin suraýynan keiin boldy.
Klient Asylhan esimdi azamattyń aitýynsha, ol Magnum-nan azyq-túlikke tapsyrys bergen kezde, kýrer odan qazaqsha sóileýdi talap etken. Keiin bul oqiǵa áleýmettik jelide jariialanyp, nátijesinde kýrer jumystan qýylǵan.
Bul jaǵdai qoǵamda úlken narazylyq týdyrdy. Qazaqstandyqtar Magnum jelisine boikot jariialaitynyn málimdedi. Áleýmettik jeli qoldanýshylary kompaniianyń áreketin synǵa alyp, memlekettik tilge degen qurmet tómen ekenin jazdy.
Alaida kúni keshe qoǵamda biraz kúnnen beri qyzý daýǵa ainalǵan Magnum máselesine núkte qoiylyp,eldi shýlatqan ekeý tatýlasyp, jurt aldyna shyqty.
