«Qazaqmys» korporatsiiasy shahtalardaǵy kenshilerdiń qaýipsizdigin arttyrýǵa arnalǵan avstraliialyq Geobotica NanoRadar innovatsiialyq geotehnikalyq baqylaý júiesin tájiribelik-ónerkásiptik synaqtan ótkizip jatyr, dep habarlaidy dalanews.kz.
Kompaniianyń málimetinshe, jobanyń negizgi maqsaty – taý-ken qazbalarynyń turaqtylyǵyn naqty ýaqyt rejiminde baqylap, kenshilerdiń ómiri men tehnikanyń qaýipsizdigine tónetin qaterdi barynsha azaitý.
Buǵan deiin NanoRadar júiesi Avstraliia, Kanada, Úndistan, Indoneziia jáne Malaiziiadaǵy iri óndiristik kásiporyndarda qoldanylyp, óziniń tiimdiligin dáleldegen.
Qazirgi ýaqytta jaryqshaqtardy anyqtaý úshin kóbine merzimdi túrde júrgiziletin lazerlik skanerleý (lidar) paidalanylady. Al Geobotica NanoRadar tehnologiiasy adamdar men tehnikanyń qaýipsizdigine qaýip tóndirýi múmkin aimaqtardy úzdiksiz baqylaýǵa múmkindik beredi.
Júie ár eki minýt saiyn taý-ken qazbasynyń tóbesine, tabanyna nemese túiisý aimaqtaryna radiojiilik signalyn jiberip, taý jynysy betiniń 0,1 millimetrge deiingi eń az ózgerisin joǵary dáldikpen tirkeidi. Osy málimetter negizinde deformatsiialardyń tsifrlyq jylý kartasy jasalyp, qaýipsiz jasyl aimaqtan bastap qaýipti qyzyl aimaqqa deiingi ózgerister kórsetiledi.
NanoRadar eki jumys rejiminde qoldanylady. Birinshi rejimde qazbanyń jaǵdaiy naqty ýaqyt rejiminde úzdiksiz baqylanyp, barlyq aqparat operatordyń plansheti nemese noýtbýginde kórsetiledi. Eger júie taý jynysynyń opyrylýynyń aldynda baiqalatyn qaýipti ózgeristerdi anyqtasa, kiriktirilgen jaryq jáne dybys dabyly avtomatty túrde iske qosylyp, qyzmetkerlerdi shuǵyl evakýatsiialaýǵa múmkindik beredi.
Ekinshi rejim uzaq merzimdi taldaýǵa arnalǵan. Bul jaǵdaida júie ártúrli baqylaý núktelerin kezekpen skanerlep, deformatsiialyq úderisterdiń damý qarqyny týraly statistikalyq derekterdi jinaidy. Osy aqparat negizinde mamandar qaýipti aimaqtardy anyqtap, ankerlik bekitpelerdiń tiimdiligin baǵalaidy jáne qajet bolǵan jaǵdaida qosymsha bekitpeler ornatylatyn oryndardy belgileidi.
Kompaniianyń málimetinshe, shaǵyn ári tasymaldaýǵa yńǵaily NanoRadar jerasty shahtalarynyń kúrdeli jaǵdaiyna beiimdelgen. IP67 qorǵanys dárejesiniń arqasynda qurylǵy shań men ylǵalǵa tózimdi. Optikalyq júielerden aiyrmashylyǵy, onyń linzalaryn únemi tazalaý qajet emes.
Júie óz akkýmýliatorymen bir jumys aýysymy boiy avtonomdy jumys istei alady. Al syrtqy akkýmýliatorǵa qosylǵan kezde eki aptaǵa deiin úzdiksiz jumys istep, bekitpe júielerin jobalaýǵa qajetti málimetterdi jinaqtaidy.
NanoRadar ámbebap júie bolǵandyqtan, ony tek jerasty shahtalarynda ǵana emes, 40 metrge deiingi qashyqtyqtaǵy taý-ken qazbalarynda, sondai-aq 120 metrge deiingi qashyqtyqta karerlerdiń erneýlerin, úiindiler men bógetterdi baqylaýǵa da qaita baptaýǵa bolady.
