Sátbaev qalasynda kásibi mereke – Kenshiler men baiytýshylar kúnine arnalǵan saltanatty shara ótti. Is-sharanyń negizgi ideiasy – «Qazaqmys qazynasy», iaǵni «Qazaqmystyń basty bailyǵy – adamdar» taqyrybyna arnaldy, dep habarlaidy dalanews.kz.
Saltanatty shara aiasynda kompaniianyń óndiristik alańdarynda eńbek etetin 300-den astam jumysker memlekettik, vedomstvolyq jáne korporativtik nagradalarmen marapattaldy. Olardyń qatarynda óndiris ozattary, sala ardagerleri, taý-ken, baiytý jáne servistik bólimshelerdiń mamandary bar.
Is-sharaǵa Ulytaý oblysynyń ákimi Eset Baiken, oblystyq máslihat tóraǵasy Baýyrjan Shyńǵysov, kompaniia aktsioneri Nurlan Artyqbaev, «Atameken» UKP Prezidiýmynyń tóraǵasy Qanat Sharlapaev, «Qazaqmys korporatsiiasy» JShS Baqylaý keńesiniń tóraǵasy Nurmuhambet Ábdibekov, «Qazaqmys korporatsiiasy» JShS Basqarma tóraǵasy Rýslan Óskenáli jáne kásiporyn basshylary, jumyskerler men sala ardagerleri qatysty.
Adam – kompaniia damýynyń negizi
Saltanatty sharany ashqan Ulytaý oblysynyń ákimi Eset Baiken kenshiler men baiytýshylardyń óńirdiń damýyna jáne eldiń ónerkásiptik áleýetin arttyrýǵa qosqan ólsheýsiz úlesin erekshe atap ótti.
«Ulytaý oblysynyń kenshileri – naǵyz eńbektiń adamdary, óńirimizdiń ǵana emes, tutas elimizdiń maqtanyshy. Kenshiler kúni – jer qoinaýyndaǵy qazynany el igiligine ainaldyryp, ekonomikanyń damýyna ólsheýsiz úles qosyp júrgen barsha sala mamandaryna qurmet kórsetetin aitýly mereke. Qanysh Imantaiuly Sátbaevtyń ǵylymi danalyǵy men kóregendiginen bastaý alǵan salany jalǵastyrýshy kenshilerimiz – kúrdeli de jaýapty kásipti abyroimen atqaryp júrgen bilikti mamandar. Memleket basshysy atap ótkendei, kenshiler – el ekonomikasynyń berik tiregi, eńbegi eren azamattar» – dedi Ulytaý oblysynyń ákimi Eset Baiken.
Eńbek adamynyń qoǵamdaǵy mańyzy taqyrybyn jalǵastyra otyryp, «Qazaqmys korporatsiiasy» JShS Baqylaý keńesiniń tóraǵasy Nurmuhambet Ábdibekov kompaniianyń óndiristik jetistiginiń artynda myńdaǵan jumysshynyń kúndelikti eńbegi, kásibiligi men jaýapkershiligi turǵanyn erekshe atap ótti.
«Kompaniianyń basty bailyǵy – nysandardyń aýqymy emes, adamdardyń bilimi, minezi jáne jaýapkershiligi. Aýqymdy óndiristik kórsetkishtiń artynda myńdaǵan aýysym, kúrdeli tehnikalyq sheshimder men kúndelikti eńbek tártibi tur. Búginde mys jasyl energetikaǵa kóshý úderisindegi mańyzdy metall bolyp tabylady. Ol energetika, kólik, bailanys, meditsina jáne jańa tehnologiialar salalaryna qajet. Demek, sizderdiń eńbekterińiz kásiporyndar men kompaniiaǵa qatysy bar óńirlerdiń damýyna ǵana emes, tutas eldiń órkendeýine yqpal etip, bolashaq ekonomikanyń negizin qalyptastyrady», – dedi Nurmuhambet Ábdibekov.
Búginde «Qazaqmys» Tobynyń quramynda 34 myńnan astam adam eńbek etedi. Olar 14 kenishtiń, 5 baiytý fabrikasynyń jáne 2 mys balqytý zaýytynyń jumysyn qamtamasyz etýde. Kompaniiada urpaq sabaqtastyǵy da saqtalǵan. Qazirgi tańda munda 103 eńbek áýleti jumys isteidi.
2026 jyly Qazaqmys eńbek qaýipsizdigine 16 mlrd teńge baǵyttap, óndiristik aktivterdi jańartýdy jáne eńbek jaǵdaiyn jaqsartýdy jalǵastyrýda. Jezqazǵanda jańa kúkirt qyshqyly tsehyn salý jobasy júzege asyrylýda. Jańa tseh tehnologiialyq gazdardyń 99%-yna deiin ustap qalýǵa múmkindik beredi.
Úzdik mamandarǵa marapat
Saltanatty shara barysynda kompaniia jumyskerlerin marapattaý rásimi ótti. «Eńbek ardageri» medalimen, túrli dárejedegi «Kenshi dańqy» jáne «Eńbek dańqy»tósbelgilerimen, sondai-aq qurmet gramotalarymen sala ardagerleri, óndiris ozattary, sheberler men jas mamandar marapattaldy.
«Ulytaý qaiyrymdylyq qory» qoǵamdyq qorynyń atynan kópbalaly anaǵa úsh bólmeli páterdiń kiltin tabystaý sharanyń eń áserli sátteriniń biri boldy.
Merekelik shara tanymal oryndaýshylar men Qazaqstan Respýblikasynyń eńbek sińirgen qairatkerleriniń qatysýymen ótken kontserttik baǵdarlamamen aiaqtaldy.
