Ulytaý oblysynyń ákimi Eset Baiken bastaǵan delegatsiia «Qazaqmys» Tobynyń óńirdegi negizgi óndiristik, salynyp jatqan jáne áleýmettik nysandaryn aralady. Óńir basshysymen birge «Qazaqmys korporatsiiasy» JShS Basqarma tóraǵasy Rýslan Óskenáli men kompaniianyń beiindi baǵyttarynyń basshylary júrdi, dep habarlaidy Dalanews.kz.
Sapardyń alǵashqy óndiristik nysany Batys Jezqazǵan kenishiniń №67 shahtasy boldy. Munda oblys ákimine ken óndirý tehnologiiasy, zamanaýi jerasty tehnikasynyń jumysy jáne ónerkásiptik qaýipsizdik standarttary tanystyryldy. Budan keiin delegatsiia «Qazaqmys Barlaý» JShS-nyń burǵylaý alańyna bardy. Basqarma tóraǵasynyń orynbasary Ǵalym Nurjanov óńirdiń mineraldyq-shikizat qoryn tolyqtyrýǵa baǵyttalǵan jáne 50 myń qýma metrden astam burǵylaýdy kózdeitin geologiialyq barlaý baǵdarlamasy týraly baiandady.
Sonymen qatar óńir basshysy Sátbaev qalalyq aýrýhanasy janynan salynyp jatqan jańa travmatologiialyq pýnkttiń qurylysymen tanysty. Nysandy 2027 jyly paidalanýǵa berý josparlanǵan. Sátbaevta delegatsiia, sondai-aq, jóndelip jatqan Kenshi dańqy alańyn aralap, «Ulytaý ýniversitetimen» birlesip taý-ken salasyna maman daiarlaityn geologiialyq klaster jobasyn kórdi.
Oǵan qosa, ákimge NAMYS sport kesheni bazasynda ashylatyn balalar men jasóspirimder sport akademiiasynyń jobasy tanystyryldy. Quny 8,1 mlrd teńge bolatyn bul keshen 150–200 tárbielenýshige arnalǵan jáne 2026 jyldyń qyrkúieginde paidalanýǵa beriledi. Sapar sońynda óńir basshysy 4,9 mlrd teńgege qaita jańǵyrtylyp jatqan «Jastar» saiabaǵyna bardy. Serýendeý jáne velosiped joldary, sýburqaq pen balalar alańy bar bul demalys ornyn abattandyrý 2026 jyldyń qazan aiynda aiaqtalady.
Sapar qorytyndysynda taraptar Ulytaý oblysynda ónerkásip, geologiia, áleýmettik infraqurylym, densaýlyq saqtaý men bilim berý salalaryn damytý jónindegi yntymaqtastyqty jalǵastyrýǵa nietti ekenderin rastady.
