Sátbaev qalalyq soty «Qazaqmys» korporatsiiasyna tiesili jeke qorǵanys quraldaryn urlaǵan merdiger uiymnyń qyzmetkerine qatysty úkim shyǵardy. Kompaniianyń málimetinshe, keltirilgen shyǵyn kólemi 2 131 426 teńge bolǵan, dep habarlaidy dalanews.kz.
Tergeý materialdaryna sáikes, zańbuzýshylyqty «Qazaqmys» korporatsiiasynyń qaýipsizdik qyzmeti ishki tekserý barysynda anyqtaǵan. №67 «Batys» kenishinde qoima meńgerýshisi bolyp jumys istegen merdiger uiymnyń qyzmetkeri jalǵan taýar-kólik júkqujatyn paidalanyp, Ultra-210 markaly respiratorlardy zańsyz iemdengen.
Ishki tekserý materialdary keiin quqyq qorǵaý organdaryna joldanǵan. Sotqa deiingi tergeý kezinde aiyptalýshy kinásin tolyq moiyndap, kompaniiaǵa keltirilgen materialdyq shyǵyndy tolyq ótegen. Sondai-aq kináni moiyndaý týraly protsestik kelisim jasaǵan.
Sátbaev qalalyq soty ony kináli dep tanyp, 3 jylǵa bas bostandyǵyn shekteý jazasyn taǵaiyndady. Sondai-aq sottalǵan azamatqa probatsiialyq baqylaý belgilenip, Jábirlenýshilerge ótemaqy qoryna zańda kózdelgen mindetti tólemdi tóleý mindetteldi. Tárkilengen múlik zańdy iesine qaitaryldy.
«Qazaqmys» korporatsiiasy korporativtik aktivterdi qorǵaý, zań talaptaryn saqtaý jáne óndiristegi ashyqtyq kompaniianyń negizgi qaǵidattarynyń biri ekenin atap ótti. Kompaniia zańsyz áreketter anyqtalǵan jaǵdaida barlyq materialdar quzyrly memlekettik organdarǵa joldanyp, kináliler zań aiasynda jaýapkershilikke tartylatynyn málimdedi.
